"Aqtóbe oblysynda meshittiń 27 jastaǵy ımamy Nurlybek Sabyrǵalıev ózine chat ashyp, boıdaq qyz-kelinshekterdiń basyn aınaldyryp, artynsha talaq etip ketýdi ádetke aınaldyrdy". Nazar Haqnazar esimdi jeli qoldanýshysy paraqshasynda osylaı dep málimdeme jasap, Qazaqstan bıliginen arasha surady.
Onyń aıtýynsha, QMDB Nurlybek Sabyrǵalıevty ımamdyqtan bosatqan. Alaıda ol dinı basqarmadan "óz erkimen jumystan ketti" dep qana alastatylǵan kórinedi.
Burynǵy ımamnyń dinı basqarmadan shyǵarylýy oǵan toqtaý bolmaǵan sekildi. Shaǵymdanýshynyń sózinshe, ımam bir jerden ekinshi jerge baryp, aram pıǵylyn iske asyrýyn jalǵastyryp júr.
– Ol – zınany halaldandyryp júrgen alaıaq. Zınaqor ımam kezekti sulýyn qushýdy josparlap Qulsary qalasyna da kelip jetken. Bul joly sur mergenniń jebesi Baıgýrshımov Rashıt esimdi azamattyń apasyn kózdegen eken. Ekinshi áıel qylyp alatyn bolyp qyzdyń áke-sheshesiniń ruqsatyn alǵan. Meshit ustap otyrǵan ımamǵa kim kúmán keltiredi? R.Baıgýrshımov aǵaıyn týmalaryn jınap, mal soıyp, qonaǵasyn berip, álgi ımam men apasynyń nekesin qıdyrtqan. Nekesi qıylǵan ımam sol kúni Aqtóbege ketip qalyp, ertesi kúni nekelengen jaryna avtomatty túrde talaq bergen... artynsha ımam qýlyǵyn asyra almaıtynyn sezip Jylyoıdan tabanyn jaltyratqan, – delingen jazbasynda.
Keıinnen ımam burynǵy qaıynaǵasy R.Baıgýrshımovten keshirim surap, aıypshapan retinde 1 mıllıon teńge aqshany shotyńa laqtyryp jiberemin dep Aqtóbege keri qaıtady. Sóıtip, 2020 jyldyń 3 qazanynda qaıta qońyraý shalyp, aqsha alyp kelip turǵanyn jetkizedi. Aqshany almaq bolǵanda daıyn turǵan operatıvtik top jazyqsyz jannyń qolyna kisen salǵan kórinedi.
Jazba avtorynyń aıtýynsha, quqyq qorǵaý qyzmetkerleri ımamnyń ótirikterine dálelsiz sengendikten, qazir is birjaqty qaralyp jatyr.
Osylaısha, Nazar Haqnazar esimdi jeli qoldanýshysy kóptegen suraqtaryn jaýdyrtyp, Jylyoı halqynyń janaıqaıyn jetkizip otyr.
Qamshy – erkin aqparat alańy. Saıtta jarıalanǵan maqalalar basylymnyń kózqarasyn bildirmeýi múmkin. Dál osy másele boıynsha ekinshi taraptyń aıtary bolsa, Qamshy ony da jarıalaýǵa ázir.
