Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine eńbek kóshi-qony máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerdi talqylady.

Osy arada aıta keterlik úlken másele, atalǵan zań jobasynda etnıkalyq qandastarymyzdyń Qazaqstan Respýblıkasynyń azamattyǵyn alý úshin elimizde mindetti túrde bes jyl turý merzimi belgilengen bolatyn. Qoǵamda túrli pikirler týdyrǵan bul merzimdi Senat tórt jylǵa túsiripti.

Májilis Senat usynǵan túzetýlerge kelisimin berip, jobaǵa «jol bolsyn» aıtyp, maquldap jiberdi. Sonymen, taǵy da kóshi-qon máselesi kún tártibine shyqty. Qadap aıtarymyz: joba zań retinde qabyldanyp, Elbasy oǵan qol qoıyp, pármen etse, syrttan kóship kelip jatqan aǵaıyndarymyz tórt jylǵa deıin Táýelsiz Qazaqstan Respýblıkasynyń azamattyǵyna ıe bola almaıdy.

Abai.kz

SOŃǴY TİLEK

QAZAQSTAN RESPÝBLIKASYNYŃ TUŃǴYSH PREZIDENTİ NURSULTAN ÁBİSHULY NAZARBAEVQA

Siz bizdi balamańyz osal erge, Tulparyn týǵan halqym tosady órde. Qazaqty el dep kelgen, Siz dep kelgen, Qaıdaǵy kelimsekke qosa kórme!

Táýelsiz elde atatyn ár tań baqyt, Qıynǵa qysylmaımyz salsań da túk. Bermesten bes jyl boıy azamattyq, Qoıǵanyń jaramaıdy jaýtańdatyp!

El bolyp degenge erte bútindeldik, Ókpe joq bolmasa da kútim derlik. Alǵaly kelgemiz joq biz eshteńe, Kelsek tek Táýelsizdik úshin keldik.

Elinen qalmasyn dep balam shettep, Jetedi el qolda barmen áreń septep. Mekkesi Qazaqstan shettegi eldiń, Oılaıdy bir kirpish bop qalansaq dep.

Aıta almaı qalamyz ba án sekeńdep, Esh ketip etken eńbek sonsha terlep?! Qudaıdan tileıdi qart kúnde úsh ýaq, Súıegim sol «Mekkede» qalsa eken dep.

Aıalap Atajurttyń nurly esimin, Anadaı terbep kelem jyr besigin. Alystan alaburtyp kelgem men de, Ónerdiń toltyram dep bir ketigin...

Kóbeıdi dyńǵyryń da, tyqyryń da, Aınaldy shetke, mine, syrýǵa. Otandy qorǵaý mindet buljymaıtyn, Kerek qoı kósheńdi de el sypyrýǵa.

Bilmeıtin týdy zaman syryn uǵyp, Jatpaıtyn jendet jasyp, ury buǵyp. Taǵdyry bes mıllıon qazaǵyńnyń, Áneý bir jalǵyz bapqa tur ilinip.

Aramyz shettegi elmen andyzdapty, Júrekti sol andyzdaý san muzdatty.

Nureke, Qudaı úshin qıshy bizge, Osynaý qasıetti jalǵyz bapty!!!

Shettegi bes mıllıon qandasyńyzdyń atynan Aýyt MUQIBEK

13.10.2013 jyl Túngi 01:01 Astana