Prezıdent Qasym-Jomart Toqaev qorǵanys mınıstriniń eki orynbasaryn taǵaıyndaý týraly buıryqqa qol qoıdy. Bul týraly akorda.kz saıty habarlady.

Prezıedent ókimimen Daryn Tuıaqov pen Muhamedjan Talasov Qazaqstan Respýblıkasy qorǵanys mınıstriniń orynbasarlary bolyp taǵaıyndaldy. 

Daryn Tuıaqov 1969 jyly Almaty oblysy Alakól aýdany Úsharal aýylynda dúnıege kelgen.

Eńbek jolyn 1990 jyly Áýe qorǵanysy radıotehnıkalyq áskerleriniń jeke radıolokasıalyq rotasy komandıriniń orynbasary bolyp bastaǵan. Qorǵanys mınıstrliginde, ádilet mınıstrliginde, Almatydaǵy komersıalyq qurylymdarda jáne "Qazaqtelekom" AQ-da jumys istedi, "Qazaqtelekom" AQ bas dırektory – shtab bastyǵy qyzmetterin atqardy.

2018 jyly Aqparat jáne komýnıkasıalar vıse-mınıstri bolyp taǵaıyndaldy.

2019 jyldan bastap ol sıfrlyq damý, qorǵanys jáne aeroǵarysh ónerkásibi vıse-mınıstri qyzmetin atqardy.

Al Muhamedjan Talasov 1967 jyly Qyzylorda oblysynda dúnıege kelgen.

Ol óziniń eńbek jolyn qarýly armıanyń KEO-da tehnıkalyq qadaǵalaý jáne jóndeý ınjeneri retinde bastady. Ol sonymen qatar bas ınjener – bastyqtyń orynbasary, KEK bastyǵy bolyp jumys istedi (1992-2001). 2004-2007 jyldary Ekonomıkalyq qylmysqa jáne sybaılas jemqorlyqqa qarsy kúres agenttigi qarjy-ekonomıkalyq basqarmasy bastyǵynyń orynbasary, bastyǵy laýazymdaryn atqardy. 2010-2013 jyldary ol Qarýly Kúshterdiń materıaldyq-tehnıkalyq qamtamasyz etý bóliminiń bastyǵy bolyp jumys istedi. 2013-2017 jyldar aralyǵynda Bas shtab bastyǵynyń orynbasary bolyp jumys istedi. 2019 jyldan bastap ol Ujymdyq qaýipsizdik týraly shart uıymynyń Birikken shtabynyń bastyǵy qyzmetin atqardy.