"Nur Otan" partıasy Tóraǵasynyń birinshi orynbasary Baýyrjan Baıbek Ońtústikke sapary barysynda Shymkent qalasynda bolyp, byltyr órt saldarynan baspanasyz qalǵan turǵyndarmen júzdesti.

"Shymkent qalasynda byltyrǵy maýsym aıynda úıleri órtengen Vodopánov kóshesindegi kópqabatty úıdiń turǵyndarymen kezdestim. Bul – bir jyl ishindegi úshinshi kezdesýimiz. Turǵyndardy aldaǵy qonys toılarymen quttyqtadym.

Jańa turǵyn úı salý máselesi jyl boıy partıanyń erekshe baqylaýynda boldy. "Nur Otan" depýtattarynyń qoldaýymen 5 qabatty úıdi salýǵa jáne ınjenerlik jelilerdi tartýǵa jergilikti búdjetten 550 mln. teńge bólindi. Jumystyń sapasy men merziminiń saqtalýyn partıalyq baqylaý komısıasy qadaǵalady.

"Nur Otan" partıasy fılıalynyń tóraǵasy, qala ákimi M.Áıtenovtiń aıtýynsha, aldyńǵy saparda ýáde etilgendeı, 42 otbasy osy qarasha aıynda quqyq belgileıtin qujattaryn qoldaryna alyp, jańa páterlerge qonystana alady.

Osy sátti paıdalana otyryp, qıyndyqqa tap bolǵandarǵa qol ushyn sozyp, ýaqytsha baspanamen, kıim-keshekpen jáne barlyq kerek-jaraǵymen qamtamasyz etken barsha partıalastar men aqjúrek azamattarǵa alǵys bildiremin", – dep jazdy partıa Tóraǵasynyń birinshi orynbasary jelidegi paraqshasynda.