Alaıaqtyq baby boıynsha tórt ret isti bolyp túrmege qamalyp, biraq merziminen buryn bosap shyǵa bergen, ondaǵan is boıynsha bereshegin ótemegen kelinshek Almagúl Bashırova týraly time.kz saıtynda maqala shyqty. Maqala avtory Mıhaıl Kozachkovtyń sózinshe, burynǵy qylmysker búginde belgili ártister keletin Le Femme sulýlyq salonyna ıelik etýshilerdiń biri. Almagúl Bashırova salonnyń ekinshi ıesi ánshi Dılnaz Ahmadıeva ekenin aıtýda.

Basylym Bashırovanyń alǵash 2007 jyly alaıaqtyq jasaǵany úshin sotty bolǵanyn jazdy. Ol kezde aıyptalýshy Semeı qalalyq sotynda maman retinde jumys istep júrgen. Sot aıypkerdiń jas ári jalǵyzbasty ana ekenin eskerip, 5 jylǵa kolonıaǵa qamaý sheshimin shyǵarady. Alaıda balasyn ósirýge múmkindik berý úshin jazanyń kúshine enýi 10 jylǵa shegerilgen.

Bashırova bul oqıǵadan soń Almatyǵa kelip, úsh áıeldi 16 mıllıon teńgege aldap ketken. Bankten 1,2 mıllıon teńgeniń joǵalýyna da Bashırovanyń kinási bar delinedi.

Bul jaıt quqyq qorǵaý organy nazarynan tys qalmaı, alaıaq 9 jylǵa sottalady. 

Bashırova túrmede júrip "abaqtydan shyǵarýǵa kómektesetin tanys advokatym bar" dep áıelder kolonıasyndaǵy kórshisinen 7,5 myń dollar aqsha alǵan. Aqshany ata-anasyna bergizgen. Uzamaı alaıaqtyń áreketin bilgen kolonıadaǵy kórshisi tıisti organǵa aryzdanǵan.

Qylmyskerdiń túrmeden qalaı shyqqany belgisiz, tek 2010 jyly bostandyqta júrip, taǵy alaıaqtyqqa anyqtalǵan. Bul joly ol 8 jylǵa sottalyp, onyń 4 jylyn otyryp shyǵady.

35 jasynda túrmeden shyqqan Bashırova zańgerlik fırma men "Konsaltıń Azıa-Úrkollegıa" kompanıasyn ashady. Áleýmettik jelige jarnama berip, zańgerlik kómekke muqtaj adamdardan qyzmeti úshin aqsha ala bastaıdy. Aldymen 300 myń, keıin 1 jarym mıllıon artynsha 2 mıllıon teńgeniń qyzmetterine tapsyrys qabyldap, birde-bir isti sońyna deıin jetkizbegen.

Sondaı-aq ol advokattyq qyzmetten bólek, "qyzmetke turǵyzyp berem", "jer telimin alyp berem" degen ýádemen adamdardan aqsha alyp otyrǵan.

2017 jyly kóptegen aryz boıynsha ustalǵanynda onyń eshqandaı zańger emes ekenin, 3 ret merziminen buryn shartty túrde bosap shyqqany belgili bolǵan. 2018 jyly Almaty qalasy Bostandyq aýdandyq soty ony 7 jylǵa sottaǵan. Artynsha qalalyq sot jazany 5 jylǵa tómendetken.

Búginde Bashırovanyń bostandyqta júrgenin aıtqan jýrnalıs onyń qaıta-qaıta bosap shyǵa beretinine tańdanys bildirip, búginde aıypker 10 óndiristik is boıynsha bereshekti ótemegenin jetkizgen. Onyń ishinde 2 qaryz sońǵy qylmystyq is boıynsha qozǵalǵan.

Maqalada 40 jastaǵy kelinshektiń qaryzdy qaıtarmaı júrgenine sottyń kóz jumyp qarap otyrǵany, 2019 jyldyń 25 qazanynan beri Bashırova Shymkent qalasy Ál-Farabı aýdandyq sotynyń sheshimimen 5 jyldyń tek 1 jarym jyldan astamyn ǵana túrmede ótkizip, bosap shyqqany jazyldy.

"Almagúl Bashırovanyń jaǵdaıy búginde jaqsy sıaqty. Instagramda ol ózin Le Femme sulýlyq salony ıeleriniń biri dep tanystyryp júr. Onyń aıtýynsha, salon ıeleriniń biri ártis Dılnaz Ahmadıeva kórinedi. Almagúl bıkesh túzý jolǵa túsip, alaıaqtyqtyq qurbany bolǵandarǵa ótemaqyny qaıtaratynyna senimmen qaraımyn. Bastysy shashyn árleýge kelgen klıentter ákimshilikke jumysqa turǵyzý sekildi basqa qyzmetke kelisip qoımasa boldy. Al Dılnaz Ahmadıevaǵa sáttilik tileımin" deıdi jýrnalıs Mıhaıl Kozachkov.