Otyrysta baǵdarlamany 2020 jyly iske asyrý nátıjeleri jáne aldaǵy jumystyń jańa basym baǵyttary qarastyryldy. Keńes barysynda aqparat jáne qoǵamdyq damý mınıstri Aıda Balaeva, bilim jáne ǵylym mınıstri Asqat Aımaǵambetov, mádenıet jáne sport mınıstri Aqtoty Raıymqulova atqarylǵan jumystar jóninde baıandady.
İs-shara barysynda jastardyń "Rýhanı jańǵyrý" baǵdarlamasyn odan ári damytýǵa baılanysty jańa bastamalary týraly Ál-Farabı atyndaǵy Qazaq ulttyq ýnıversıtetiniń rektory Ǵalymqaıyr Mutanov pen prezıdent janyndaǵy ulttyq qoǵamdyq senim keńesiniń múshesi, saıasattanýshy Erlan Saırovtyń usynystary da talqylandy.
"Rýhanı jańǵyrý" baǵdarlamasyn iske asyrý jónindegi 2020 jylǵa arnalǵan is-sharalar josparynyń oryndalýy da talqylandy. Álemdik pandemıa men ekonomıkalyq daǵdarys kóptegen sharalar men jobalardyń júzege asýyna shek qoıdy, kedergi boldy, basym kópshiligin aldaǵy kúnderge jyljytýǵa týra keldi. Sondyqtan keıbir sharalardyń konsepsıasy qaıta qaraldy.
Baǵdarlama aıasynda elimizdiń rýhanıaty men tarıhyn, ádebıeti men mádenıetin, bilimi men ǵylymyn tereńdetý, tanytý, zertteý baǵyttary boıynsha jumystar keńinen jalǵasýda.
Komısıa otyrysynda memlekettik hatshy Qyrymbek Kósherbaev "Tuńǵysh Prezıdentimiz – Elbasy Nursultan Ábishuly Nazarbaev "Jańǵyrý eldiń ulttyq-rýhanı tamyrynan nár ala almasa, ol adasýǵa bastaıdy. Rýhanı jańǵyrý ulttyq sananyń túrli polústerin qıynnan qıystyryp, jarastyra alatyn qudiretimen mańyzdy" dep atap ótse, memleket basshysy Qasym-Jomart Kemeluly Toqaev bıylǵy halyqqa Joldaýynda: "Qazirgi mindet – halqymyzdyń jańa bolmysyn qalyptastyrý, tutas ult sapasyn arttyrý. Qazaq qoǵamynda jańa qaǵıdattar jáne jańa baǵdarlar saltanat qurýǵa tıis» ekenin aıryqsha aıtty. Iaǵnı, ulttyq sanany jańǵyrtýdaǵy osy saıası sabaqtastyqty negizge ala otyryp, biz rýhanı jańǵyrýdyń ulttyq jańǵyrýǵa ulasýyna barynsha kúsh-jigerimizdi salyp, ultymyzdy jańa sapalyq deńgeıge kóterýge qyzmet etýimiz kerek" dep atap ótti.
Osyǵan oraı, Komısıada "Rýhanı jańǵyrý" baǵdarlamasyn odan ári tereńdetip Ulttyq jańǵyrý kezeńine ótkizýdiń arnaıy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategıalyq maqsaty bolyp qalady.
Jol kartasynda Memlekettik til mártebesin arttyrý, Joǵary ulttyq jáne jalpyadamzattyq qundylyqtar negizinde rýhanı-adamgershilik jáne patrıottyq tárbıe berý, Eńbek adamyn qalyptastyrý, Aýyldy túletý sıaqty t.b keshendi is-sharalar qamtylady.
Memlekettik hatshy otyrysty qorytyndylaı kele, memlekettik jáne atqarýshy organdarǵa «Rýhanı jańǵyrý» baǵdarlamasynyń basym baǵyttary boıynsha jumysty odan ári jandandyrý jóninde naqty tapsyrmalar berdi.
