Almaty qalasy ákiminiń orynbasary Erjan Babaqumarov QR-ǵy bala quqyqtary jónindegi ýákil, qoǵam qaıratkeri A. Saın jáne qalalyq Bilim basqarmasynyń basshysy L. Jylqybaevamen birge jetim balalarǵa mamandandyrylǵan «Januıa» keshenine bardy.

Jetim balalarǵa arnalǵan «Januıa» mamandandyrylǵan kesheninde jetim balalar, ata-anasynyń qamqorlyǵynsyz qalǵan, oqytý men tárbıeleý rejımi bar balalar jáne múmkindigi shekteýli balalar oqıdy.

Keshendi aralaý barysynda balalardyń turý jaǵdaıyn jaqsartý, sapaly oqytýdy qamtamasyz etý úshin oqý materıaldarymen jabdyqtaý máseleleri talqylandy. Mekeme tárbıelenýshileriniń durys tamaqtanýy máselelerine jeke nazar aýdaryldy.

Mekeme aýmaǵynda balalar men qyzmetkerlerdiń juqtyrýyn boldyrmaý maqsatynda sanıtarlyq-epıdemıalyq talaptardyń saqtalýy jáne barlyq qajetti qorǵanys quraldarymen qamtamasyz etilýi tekserildi.

Jıyn qorytyndysy boıynsha ákimniń orynbasary Erjan Babaqumarov Bilim basqarmasy men mamandandyrylǵan mekeme basshylyǵyna «Januıa» kesheninde oqıtyn jetim jáne múmkindigi shekteýli balalardyń quqyǵyn qamtamasyz etý boıynsha naqty tapsyrmalar berdi.