Taýly Qarabahta atysty toqtatý týraly kelisim jasalyp, Ázerbaıjan Qarabahtaǵy birneshe aýdandy ózine qaıtaratyn boldy. Ázerbaıjan prezıdenti Ilham Álıev, Armenıa premer mınıstri Nıkol Pashınán men Reseı prezıdenti Vladımır Pýtın arasynda jasalǵan kelisim nátıjesindegi birlesken málimdeme 9 bólimnen turady.

Kelisimge saı, Taýly Qarabahtaǵy atys toqtatylyp, Gazah, Agdam aýdandary 20 qarashaǵa deıin Ázerbaıjanǵa qaıtarylady.

Taýly Qarabah pen Lashyn dálizi mańynda bitimgershilik aýmaq qurylady. Onyń myzǵymastyǵyna Reseı tarapy 5 jyl boıy kepil bolady. Taraptardyń biri atalǵan kelisimdi buzsa, bitimgershilik mısıa taǵy 5 jylǵa uzartylady. Bul maqsatta 1960 atys qarýy bar ásker, 90 oq ótkizbeıtik kólik, 380 avtokólik pen arnaıy teknıka jiberiledi.

Kelisimniń oryndalýyn qadaǵalaý tıimdiligin arttyrý maqsatynda bitimgershilik ortalyq qurylady.

Armenıa 2020 jylǵy 15 qarashaǵa deıin Ázerbaıjanǵa Kelbadjar aýdanyn, 2020 jylǵy 1 jeltoqsanǵa deıin Lashyn aýdanyn qaıtarýǵa tıis. Taýly Karabah pen Armenıany eni 5 shaqyrymdyq Lashyn dálizi baılanystyryp turady.

Aldaǵy 3 jylda Lashyn dálizi arqyly ótetin jańa marshrýt qurylysynyń jospary bekitilýi kerek. Dáliz Stepanakert pen Armenıa arasyn jalǵamaq. Ázerbaıjan tarapy dáliz arqyly júretin azamattardyń, kólik quraldarynyń, júk kólikteriniń qaýipsizdigine kepil bolady.

Taýly Qarabahqa azamattardyń oralýy bosqyndar jónindegi BUU Joǵarǵy komısarynyń qadaǵalaýynda bolady.

Áskerı tutqyndar men ustalǵan ózge azamattar, qaza tapqandardyń denesi almastyrylady.

Aımaqtaǵy ekonomıkalyq jáne kólik baılanystary qaıta qalpyna keltiriledi. Armenıa Ázerbaıjannyń batys aýdandary men Nahıchevan avtonomıalyq respýblıkasy (Ázerbaıjan quramyndaǵy avtonomıalyq respýblıka) arasyndaǵy kedergisiz qozǵalys pen kólik baılanysyn qamtamasyz etedi. Kólik qozǵalysy Reseı shekara qyzmeti tarapynan qadaǵalanady.

Nahıchevan avtonomıalyq respýblıkasy men Ázerbaıjannyń batys aýdandaryn baılanystyratyn jańa kólik komýnıkasıalarynyń qurylysy bastalady.