Búgin májilis spıkeri Nurlan Nyǵmatýlınniń tóraǵalyǵymen palata búrosy ótip, onda aldaǵy jalpy otyrystyń kún tártibi naqtylandy.

Májilis birinshi oqylymda «Qazaqstan Respýblıkasynyń Úkimeti týraly» Konstıtýsıalyq zańǵa ózgerister engizý jáne Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynyń jekelegen erejelerin iske asyrýǵa qatysty zań jobasyn talqylamaq.

Sonymen qatar, palata birinshi oqylymda týrısik qyzmet, normashyǵarmashylyqty jetildirý máseleleri boıynsha túzetýler jáne advokattyq qyzmet pen zań kómegine qatysty depýtattyq zań jobalaryn qaraıtyn bolady.

Aldaǵy jalpy otyrysta ortalyq jáne jergilikti memlekettik organdar arasynda aýyzsýmen jabdyqtaýdy sýbsıdıalaý jónindegi ókilettikterdiń arajigin ajyratý máseleleri boıynsha depýtattyq zań jobasy birinshi oqylymda qaralady dep josparlanýda.

Sondaı-aq depýtattar qaraýyna dene shynyqtyrý jáne sport máseleleri boıynsha zań jobasy da usynyldy.

Búronyń kún tártibiniń jobasynda májilis depýtattary ekinshi oqylymda birqatar ekologıalyq zań jobalaryn qaraıdy. Olar Ekologıalyq kodekspen oǵan ilespe zań jobalary.

Ekinshi oqylymda qaralatyndar qatarynda qoǵamdyq keńesterdiń qyzmeti týraly jáne depýtattar ázirlegen kúzet qyzmeti máseleleri zań jobalary, sondaı-aq, adamdardy Qazaqstan sheginen tys jerge shyǵaryp jiberýge jáne búdjet zańnamasyn jetildirýge qatysty zań jobalary bar.

Sonymen birge aldaǵy jalpy otyrysta palata dıplomatıalyq qyzmet týraly zań jobasyn jumysqa almaq.

Májilistiń baspasóz qyzmeti