1 jeltoqsanynan bastap Almaty jáne Nur-Sultan qalalarynan Túrkistan qalasyna áýe reısteri ushýdy bastaıdy, dep habarlaıdy Qamshy.kz aqparat agenttigi Túrkistan ákiminiń baspasóz qyzmetine silteme jasap.

Alǵashqy reıs Nur-Sultan – Túrkistan – Nur-Sultan baǵyty boıynsha oryndalady. Azamattyq avıasıa komıteti Túrkistan qalasynyń áýejaıyna turaqty reıster ashý boıynsha jumys júrgizýde.

Bastapqy kezeńde Nur-Sultan jáne Almaty qalalarynan Túrkistanǵa kún saıyn reıster oryndaý josparlanyp otyr. Reısterdi "Fly Arystan", "SCAT" jáne "Qazaq Air" sekildi 3 qazaqstandyq áýe kompanıasy oryndaıdy. "Fly Arystan" kompanıasy bul baǵyttar boıynsha bıletterdi satýdy bastady. Bıletterdiń baǵasy Nur-Sultan jáne Túrkistan qalalary arasynda 6999 teńgeden jáne Almaty men Túrkistan qalalary arasynda 5999 teńgeden bastalady.

"Túrkistan qalasynan 20 shaqyrym jerde ornalasqan halyqaralyq áýejaı zamanaýı tehnologıalardy qoldana otyryp, halyqaralyq standarttarǵa sáıkes salynǵan. Áýejaıdyń jalpy aýdany – 905 gektar bolsa, ushý-qoný jolaǵy – 3 300h45 metr. Jolaýshylar termınalynyń aýdany – 10,5 myń sharshy metr.

Táýelsiz Qazaqstandaǵy alǵashqy jańa áýejaı qurylysynyń jobasy qazirgi Túrkistannyń aýqymdy qurylysynyń iri jáne mańyzdy nysandarynyń birine aınaldy. Sheteldik ınvestorlar qurylysty rekordtyq merzimde aıaqtady.

Aldaǵy ýaqytta Qazaqstannyń basqa da oblys ortalyǵymen baılanys ornatylady. Sondaı-aq Mekke men Stambýlǵa reıster ashý josparlanǵan. Áýejaı sheteldik avıakompanıalardyń ushýy úshin "ashyq aspan" rejımine qosylady. Bul áýejaıdan ushý geografıasyn keńeıtip, sheteldik týrıser aǵynyn tartýǵa yqpal etedi" delingen aqparattyq habarlamada.