Belorýste prezıdent saılaýynda Aleksandr Lýkashenko jeńgennen keıin halyq alańǵa shyǵyp ádiletti saılaý ótýin jáne Lýkashenkonyń otstavkaǵa ketýin talap etip qarsylyq aksıasyna shyqqan. Sodan beri 100 kún ótti. Narazalyq bildirýshiler tolqyny tolastar emes.

Polısıa gúl men shar ustaǵan áıelderdi kúshtep kólikke salyp, zeınetkerlerge kóz ashytatyn gazdy qoldanǵanyna qaramastan ár jeksenbide el astanasy Mınskte myńdaǵan adam qarsylyq aksıasyna shyǵyp, ádildikti talap etýde.

BBC sherýge qatysýshylarmen suhbattasty. Onyń qazaq tilindegi nusqasyn nazarlaryńyzǵa usynamyz. 

"Ekinshi dúnıejúzilik soǵysty eske saldy"

IT salasynda jumys isteıtin 31 jastaǵy Olesá ár jeksenbide sherýge qatysady. Polıseıler bul joly alańǵa jınalǵandardy dýbınkamen uryp, elektroshokerdi paıdalanǵan.

– Polıseıler bizge qaıta-qaıta shabýyldady. Sumdyq boldy. Sózben aıtyp jetkizý múmkin emes. Adamdardy asa qatigezdikpen uryp, qolyn qaıyryp áketip jatty, – deıdi Olesá.  

Ol basqa adamdarmen birgi kóp qabatty úıge qaraı qashty. Polıseıler kóligimen olardy qýyp jetip kóbin ustady. Beıtanys adam Olesá men basqa da adamdardy úıine kirgizip, olar aman qalǵan.  

– Ekinshi dúnıejúzilik soǵysta evreılerdi nasısterden qutqarý úshin jasaǵandaı biz de tyǵylýǵa májbúr boldyq. Eseńgirep qaldyq, – deıdi Olesá.

Osy jeksenbide ótken sherýge azamattar polıseıler soqqyǵa jyǵyp,  aýrýhanada qaıtys bolǵan Roman Bondarenkonyń qurmetine shyqty.

Daýys berý nátıjesi jarıalanǵannan keıin 100 000 adam narazylyq aksıasyna shyqty. Olar ádiletti saılaý ótýin, saıası tutqyndardy bosatýyn jáne polısıanyń qatigezdigin toqtatýdy talap etti.

"Polısıa páterge basa kóktep kirdi"

18 jastaǵy Dıana Pchelnıkova jaqynda ótken narazylyq sherýde ómirindegi eń qorqynyshty sátti bastan ótkergen. Ol ózge sherýshilermen birge polısıadan qorǵaný úshin úı dálizine qashyp kirdi. Beıtanys áıel olardy úıine kirgizdi, biraq polısıa baıqap qoıǵan.  

– Men úıge kirgen sońǵy adammyn. Polıseıler meniń arqamnan dýbınkamen urdy. Biz esikti jabýǵa tyrystyq, alaıda olardyń kúshi basym boldy. Ofıser páterge kirip er adamnyń bárin jınap, qarsylyq bildirgenderdi dýbıkamen urdy. Áıelder aıqaılap polıseılerden olarǵa kúsh kórsetpeýin jalynyp surady. Men qatty qoryqtym. Polıseıler kóbin alyp ketti. Keıbiri páterde tyǵylyp úlgerdi. Biri dıvannyń artyna, endi biri shkafqa tyǵyldy. Úshinshisi balkonda bolǵan, – dep eske aldy Dıana.

"Polıseıler bizdi uryp óltirýdi maqsat tutqandaı soqqyǵa jyqty"

Polıseılerdiń uryp, soqqanyna qaramastan sherý báseńdemedi. Kásipker Vladımır (esimi ózgertilgen) "Narazylyq aksıasyna ár barǵan saıyn úıge qaıtyp kelemin be, joq pa degen oımen baramyn" deıdi.

Vladımırdi tamyzda Orkestına túrmesine jiberý týraly sheshim shyqqan. Túrmede ony  aıaýsyz soqqyǵa jyqqan. "Polıseıler bizdi uryp óltirýdi maqsat tutqandaı soqqyǵa jyqty" dep qorqynyshpen eske alsa da sherýge qatysyp, ádildikti talap etýge bekinip otyr. Kúsh, qaıraty burynnan da artqanyn aıtady.  

Úsh jarym aıǵa sozylǵan narazylyq sherýi Belorýs halqyn ózgertti. Halyq bolashaǵy jarqyn elde turý úshin qazir áreket etý kerektigin túsindi. Onyń biri 29 jastaǵy Andreı Pogerıla.

Prezıdent saılaýyna deıin Andreı saıasatqa qyzyqpaıtyn. Daýys berý nátıjesi jarıalanyp, halyq túnde alańǵa shyqqanda ol kafede otyrǵan. Halyq ne úshin jınalǵanyn kórý úshin dalaǵa shyqqanda kýá bolǵan kórinisten keıin ómiri túbegeıli ózgerdi.

– Bári beıbit ótip jatty. Bir mezette polıseıler kelip halyqty asqan qatigezdikpen ura bastady. Óz kózimmen olardyń jas qyzdy dýbınkamen urǵanyna kýá boldy. Bir jigitti aıaýsyz soqqyǵa jyqtyǵ – dep eske aldy Andreı.

Osyny kórgennen keıin ol oılanbastan sherýshiler qataryna qosyldy.

Belorýs prezıdenti Lýkashenko sherýshilerdi shetel qarjylandyrǵan dep aıyptady. Maskúnem, nashaqor dep atady. Basty opozısıa kóshbasshylary túrmege qamaldy nemese elden qashyp ketti. Olar sherýge qatyspady.

Alańǵa múgedek te, stýdent te, zeınetker de jınaldy

Belgili sportshylar ashyq túrde prezıdent saılaýy qaıta ótýin jáne polısıa qatigezdigin toqtatýyn talap etti.

Teatr akterleri spektákldiń basynda opozısıanyń ánuranyn aıtyp sherýshilerdi qoldaıtynyn bildiri.

Belsendiler óz qarsylyǵyn saýda úılerinde fleshmob arqyly kórsetti.

Polıseıler sherýshilerdiń urandary jazylǵan plakattardy julyp alǵanymen kelesi kúni dál sol jerde jańa plakat ilinip turatyn.

Polıseılerdiń qatigezdigine qaramastan halyq sherýdi beıbit túrde ótkizdi. Polıseıler olarǵa qatigezdik tanytqanymen kelesi sherýge gúlmen keldi.

– Polıseılerdiń qatigezdigin kórgende olar sekildi bolǵyń kelmeıtinin túsinesiń. Men tabandylyq pen ózime degen senimdilik arqyly óz kúshimdi kórsetemin, – deıdi 32 jastaǵy Svetlana Stanchenko. Ol sherýge qatysqany úshin 9 kún túrmege otyryp shyqty.