Senat 2021-2023 jyldarǵa arnalǵan respýblıkalyq búdjetti qarady. Soǵan sáıkes osy ýaqyt ishinde búdjet qarajatynyń jartysynan astamy áleýmettik salaǵa jumsalatyny jáne qarjy kólemi jyl saıyn artyp otyratyny belgili boldy. Bul týraly senattyń baspasóz qyzmeti habarlady.

Aldaǵy úsh jylda áleýmettik salaǵa bólinetin qarjy kólemi – 23 trln. teńge. Onyń 7 trln-y nemese jyldyq búdjettiń 50,4 paıyzy – 2021 jylǵa josparlanǵan. Al 2023 jyly bul kórsetkish 61,6 paıyzǵa jetkiziledi.

– Syrtqy naryqtaǵy kúrdeli jaǵdaıǵa baılanysty daǵdarysqa qarsy keshendi is-sharalardy qarjylandyrý jalǵasa beredi. Búdjetti qaraý barysynda aldaǵy úsh jylda azamattardyń áleýmettik máselelerin sheshýge basymdyq berildi. Soǵan sáıkes 2021 jyly búdjet shyǵyndarynyń 50 paıyzdan astamy áleýmettik salaǵa baǵyttalady. Prezıdentimizdiń tapsyrmasymen, ekonomıkadaǵy qıyndyqtarǵa qaramastan, búdjette barlyq áleýmettik mindetterdi oryndaýǵa kerekti qarjy qarastyrylǵan. Bul qarajat áleýmettik tólemderdi ındeksasıalaýǵa, muǵalimder men dárigerlerdiń jalaqylaryn kóbeıtýge jáne halyqqa medısınalyq qyzmet kórsetýge jumsalady, – dedi senat tóraǵasy Máýlen Áshimbaev.

Basym baǵyttardyń qatarynda medısına qyzmetkerleri men muǵalimderdiń jalaqysyn ósirý máselesi bar.

Soǵan sáıkes aldaǵy úsh jyldyń ishinde dárigerlerdiń jalaqysy jyl saıyn 30 paıyzǵa kóbeıtiledi. Al kishi medısına qyzmetkerleriniń jalaqysy 2021 jyly – 20 paıyzǵa kóbeıtilse, 2022 jáne 2023 jyldary 10 paıyzdan ósirilip otyrady.

Muǵalimderdiń jalaqysy da jyl saıyn 25 paıyzǵa kóbeıetin bolady. Pedagogtardyń tabysyn arttyrý úshin qosymsha tólemderdi qosa alǵanda 2021 jyly bıylǵy 2020 jylǵa qaraǵanda 305 mlrd. teńgege kóp qarajat bólinedi.

Jalpy, bilim jáne ǵylym júıesin damytý úshin respýblıkalyq búdjette aldaǵy úsh jylǵa 5,1 trln teńge qarastyrylǵan. Kelesi jyly bul salaǵa 1,3 trln teńge bólinedi. Bul – 2020 jylǵy qarajattan 458 mlrd-qa kóp.