Bir saılaýdan ekinshisine deıin qalǵyp-múlgip otyratyn Qazaqstandaǵy saıası partıalar búginde erekshe belsendi. Oǵan alda kele jatqan májilis pen máslıhat saılaýy sebep. Belsendilikti basqalardan burynyraq komýnıser bastady.

Komýnıser parlamentke ótken sanaýly ǵana partıanyń biri. Májilistiń sońǵy shaqyrylymynyń qataryna kirgen partıanyń 7 depýtaty 5 jylda nesimen este qaldy dep oılanyp kórsek, áýeli qart depýtat Kosarevtiń parlament qabyrǵasyndaǵy qoryly eske túsedi.

Oqıǵa bıyl qańtarda májilis úıindegi kezekti otyrystardyń birinde bolǵan. Qazaqstandaǵy eń egde depýtat 82 jastaǵy Vladıslav Kosarevtiń jıyn barysynda kózi ilinip ketken. Kózi ilinip ketti deý jumsaq aıtylǵandyq. Kosarev shyn máninde qalyń uıqyǵa ketti. Ony qalyń uıqydan qulaǵynyń túbinde mıkrofonmen sóılep turǵan áriptesiniń daýsy da oıata almady. Oqıǵa vıdeosy áleýmettik jelige tarap, qoǵamda qyzý talqy bastalǵan. Qamısha Esmuhambetqyzy degen jeli qoldanýshysynyń "Bizge Kosarev degen depýtat nege kerek? Uıyqtaý úshin be? Sonda ne, uıqysyn qandyrý úshin memleket qarjysynan 900 000 teńge tóleımiz be?» dep shyqqan daýsy jaǵdaıdy dálme-del sýrettep tur.

Osy oqıǵadan keıin jurttyń kózine jaqsy bolyp kóriný úshin komýnıserge pandemıa jaqsy sebep boldy. Olar alda kele jatqan saıası dodanyń dúbirine erte qosylý maqsatymen tótenshe jaǵdaı men karantınnen turmysy tómendegen turǵyndar úshin unamdy sóz aıtýǵa tyrysty.

Qoǵam belsendileriniń kredıtti keshirý ıdeıasyn adamdar 100 myńdap qoldap jatqanyn kórip «ótimdi sóz osy bolar-aý» dep parlament qabyrǵasynda «halyq kredıtin keshireıik» dep bastamalatty. Úkimet basshysyna depýtattyq saýal joldap, el ıgiligi jolyndaǵy erler bolyp kórinýge baryn saldy.

Árıne olardyń bul bastamasy qoldaý tappaıtynyn ózderi bilmedi emes, bildi. Biraq olarǵa mańyzdysy ol emes, mańyzdysy jurtqa jaǵatyn sóz aıtý, qara halyqqa qamqorshy bolyp kóriný edi.

Buǵan aldanatyndaı halyqty ańǵal dep oılasa, komýnıser qatty qatelesti. Táýelsizdikke qol jetkizgen 30 jylda buqara kimniń-kim ekenin jaqsy tanyp alǵan. Unamdy sóz aıtty eken dep komýnıserge ishi jylyǵan qoǵam bolmady.

Olar sonda da halyq yqylasyna bólenýge talaptanyp kórýge tyrysyp, partıa atyn aýystyrýǵa bel sheshti. Burynǵy «Qazaqstan komýnıstik halyq partıasy» ataýynan bas tartyp, «Qazaqstannyń halyq partıasy» degen atty tańdady. Estigen adamǵa jyly tıetin uǵymdardy tańdap alǵanymen, kóp ótpeı-aq olardyń tek aty ǵana ózgerip, zaty báz-baıaǵysha qalǵany belgili boldy. Partıa hatshysy Jambyl Ahmetbekovtyń «Partıa ataýynyń «Qazaqstannyń halyq partıasy» bolyp ózgerýi – komýnıstik ıdeologıadan ketý degen sóz emes» degen sózi bunyń bári halyq qamy úshin emes, aldaǵy 5 jyldy májilistiń jyly kreslosynda ótkizý qamy úshin jasalyp jatqanyn ańǵartty. Osydan keıin komýnıser popýlıs emeı nemene?!

Aıbar Ómirqoja