Pavlodar oblysynyń ákimi Ábilqaıyr Sqaqov "Gremmı" syılyǵyna úmitker, Imanbek Remix degen laqap atpen tanymal Imanbek Zeıkenovpen  kezdesip, oǵan qoldaý kórsetýge ýáde berdi. Bul týraly Pavlodar oblysy ákimdiginiń baspasóz qyzmeti habarlady. 

– Bárimiz sen úshin jankúıer bolamyz. Sen bizdiń óńirdiń ǵana emes, búkil Qazaqstannyń naǵyz maqtanyshysyń. Qajet bolǵan jaǵdaıda, bizdiń tarapymyzdan kez kelgen kómek kórsetiletinine senimdi bol, – dedi Ábilqaıyr Sqaqov Imanbekke.

Mýzykant ákimge alǵysyn bildirip, qazirgi tanymal "Roses" remıksin jasaý úshin bar bolǵany 2 saǵat 20 mınýt ketkenin aıtty.
 
– Buryn mýzyka salasynda bárin tanys pen aqsha sheshedi dep oılaıtynmyn. Biraq ózime qarap, bulaı emes ekenine kózim jetti. Jolym boldy deýge bolady. Menimen áriptestik ornatqan leıbl jigitterimen kóp jumystar atqardyq. Mýzykany jazý barysynda men adamdar oǵan qalaı bıleıtinin, áýen qandaı emosıalar týdyratynyn elestetemin, – dep Imanbek oıymen bólisti.

Óńir basshysy Imanbekke árdaıym óz betinshe bıikterge qol jetkizgen qarapaıym jigit bolyp qalýdy tilep, óziniń telefon nómirin berdi. Qajet bolǵan jaǵdaıda qońyraý shalýdy usyndy.

Imanbek Zeıkenov Pavlodar oblysy Aqsý qalasynda ata-anasymen birge turady. Jasy 20-da. Aqsýlyq dıdjeı jáne mýzykalyq prodúser. Oǵan Saint jhn "Roses" ánine jazǵan remıksi úlken tanymaldyq ákeldi. Bul trek "Úzdik remıks" atalymy boıynsha 2020 jylǵy Gremmı syılyǵyna usynyldy. Jeńimpazdar 2021 jyldyń 31 qańtarynda anyqtalady. Mýzykant tanymal álemdik ártistermen birlesip, ortaq joba daıyndaý ústinde.    

"Gremmı" –  Amerıkalyq dybys jazý akademıasynyń premıasy.  14 naýryzda 1958 jyly qurylǵan. Búgingi kúni mýzyka ındýstrıasynda eń abyroıly marapat bolyp sanalady, kıno ındýstrıasynda tek Oskarmen teńesedi. Jyl saıyn 108 kategorıa boıynsha mýzykanyń 30 janry boıynsha "Recording Academy" músheleri "Gremmı" syılyǵyn tabystaıdy.