Birikken Ulttar Uıymynyń burynǵy Bas hatshysy Pan Gı Mýn "Nursultan Nazarbaev – jahandyq aýqymdaǵy saıasatker" atty halyqaralyq konferensıada sóz sóılegen alǵashqy spıkerlerdiń biri. Ol ortaq bolashaqty qurýǵa kómektesý úshin ótkenimizde jahandyq beıbitshilik pen qaýipsizdikti ilgeriletýge ýaqtyly yqpal etken eren kóshbasshylyq kórinis tapqan kezeńderdi jeke dara kórsetý óte mańyzdy ekendigin atap ótti, dep jazady ortcom.kz saıty.

Spıkerdiń aıtýynsha, sońǵy onjyldyqtardaǵy osyndaı mańyzdy sátterdiń biri – Qazaqstandaǵy Semeı ıadrolyq synaq polıgonynyń sátti jabylýy jáne keńestik strategıalyq ıadrolyq arsenaldan óz erkimen bas tartýy boldy. Bul adamzat úshin, bizdiń planetamyz úshin tarıhı sheshim boldy. polıgonda jasalǵan 500-den astam jarylys jergilikti turǵyndardyń densaýlyǵy men qaýipsizdigine, qorshaǵan ortaǵa úlken zıanyn tıgizdi.

– Aımaqtyq jáne halyqaralyq qaýipsizdikti nyǵaıtqan bul batyl qadam sonymen qatar Qazaqstannyń ıadrolyq qarýsyzdaný men taratpaý salasyndaǵy jahandyq kóshbasshylyǵynyń bastamasy boldy, sondaı-aq syrtqy saıasattyń tabysty bolýyna jáne jas ulttyń jańa qalyptasyp kele jatqan dıplomatıasynyń jańa bıikterge kóterilýine yqpal etti. Buǵan 2002 jylǵy mamyrdaǵy Iadrolyq synaqtarǵa jappaı tyıym salý týraly kelisimdi ratıfıkasıalaý; 2015 jyly Birikken Ulttar Uıymy Bas Assambleıasynyń Iadrolyq qarýsyz álem qurý týraly mańyzdy deklarasıasyn qabyldaýǵa bastamashylyq etý, jáne Birikken Ulttar Uıymyna 29 tamyzdy Halyqaralyq ıadrolyq synaqtarǵa qarsy is-qımyl kúni dep jarıalaýǵa járdemdesý de kiredi. Birikken Ulttar Uıymynyń burynǵy Bas hatshysy retinde men sheshýshi kóshbasshylyq mańyzdy sátterde jekelegen halyqtardyń ǵana emes, búkil álemniń traektorıasyn ózgertýge kómektese alatyndyǵyna birneshe ret kýá boldym. Osy múmkindikti paıdalanyp, barlyq jahandyq kóshbasshylarǵa BUU-nyń ıadrolyq synaqtar men taratýǵa tyıym salynǵan álemdi, sondaı-aq biz ıadrolyq qarýdan tolyǵymen azat bolatyn álemdi qurýǵa járdemdesýde kúsh-jigerin qaıta jandandyrýǵa shaqyramyn, – dep atap ótti Pan Gı Mýn Elbasy Nazarbaevqa sol tarıhı sheshimi úshin, sondaı-aq Qazaqstannyń jarqyn álemdi qurýǵa kómektesý jolynda jalǵasyn taýyp jatqan kúsh-jigeri úshin zor rızashylyǵyn bildire otyryp.