Azamattyq belsendiler men birqatar zańgerler Qazaqstanda jynystyq bopsalaýǵa zań júzinde tyıym salýdy talap etýde. Olar eldegi máselege nazar aýdarýǵa shaqyryp, prezıdent Qasym-Jomart Toqaevtyń atyna "Qazaqstanda jynystyq bopsalaýǵa zań júzinde tyıym salý týraly" petısıa joldady, dep habarlaıdy Qamshy.kz aqparat agenttigi "Quqyqtyq saıasatty zertteý ortalyǵynyń" baspasóz qyzmetine silteme jasap. 

Belsendilerdiń pikirinshe, jynystyq bopsalaýǵa qatań da naqty jaza bekitpese, qurbandar sany kóbeıedi. Bopsalaý saldary zorlyqqa, tipti adam ólimine ákelýi múmkin. Mamandardyń esebinshe, tıisti zańnyń joqtyǵynan jumysta, qoǵamdyq oryndarda zábir kórip, zorlyq kórgender qatary sońǵy jyldary arta túsken. Biraq ol týraly kóbi tis jarmaıdy. Jynystyq bopsalaý boıynsha elde 20 jylda 87 is tirkelgen. Alaıda birde-bir aıyptalýshy bas bostandyǵynan aıyrylmaǵan. Óıtkeni zábir kórýshiniń quqyǵyn qorǵaıtyn arnaıy zań joq.

Petısıa mátininde "Biz, Qazaqstan azamattary, Sizdi eldegi jynystyq bopsalaý máselesine nazar aýdarýǵa shaqyramyz! Biz qoǵam retinde budan bylaı azamattarymyzdyń óz qaýipsizdigine qol suǵýshylyqtan zardap shegetinine, balalar men eresekter bopsalaýdyń qurbanyna aınalatynyna jáne agresorlar zańmen qatań jazalanbaıtynyna beı-jaı qaraı almaımyz. Jynystyq bopsalaý sebebinen adamnyń psıhıkalyq densaýlyǵy nasharlap, uıqysy buzylyp depressıaǵa túsedi. Jynystyq bopsalaý sońy óz-ózine qol jumsaýǵa sebep bolýy múmkin. Biz ár adamnyń ar-namysy men qadir-qasıetine qol suǵylmaıtyn, zorlyq-zombylyq jasalmaıtyn elde ómir súrgimiz keledi!" delingen.

– Qazaqstanda jynystyq bopsalaý uǵymy burmalanǵan. Jańa zań jobasynda, eń aldymen, biz durys termınologıany, harassmenttiń durys jáne salmaqty túsinigin kóremiz. Bul reforma jasy, jynysy men ulty, áleýmettik jaǵdaıyna qaramastan kez kelgen adamnyń jeke ómirine qol suǵýshylyqtyń aldyn alady. Keı jaǵdaıda zorlaý nemese kisi óltirýdiń aldyn alýy múmkin, – deıdi "Quqyqtyq saıasatty zertteý ortalyǵy" QQ baǵdarlamalarynyń úılestirýshisi Aıajan Oıratova.

Eske sala keteıik, qazir Qazaqstanda jynystyq bopsalaý úshin qylmystyq jaza engizý týraly zań jobasy  qarastyrylýda.

Petısıa avtorlary bilim berý jáne medısınalyq mekemelerde jynystyq bopsalaǵany úshin sottalǵan adamdardyń tizimin qurýdy usynyp otyr. Sondaı-aq kámeletke tolmaǵandardy jynystyq bopsalaǵandardy, ata-analary men zańdy ókilderin qatań jazalaýdy talap etýde. Jumys ornyndaǵy jynystyq bopsalaýǵa qatysty jumys berýshilerge ishki saıasatyn ázirlep, Eńbek kodeksine sáıkes erejeler engizýdi usyndy.

Petısıaǵa qol qoıý úshin https://otinish.kz/ru/petition/40  saıtyna ótińiz.