Elde jarıalanǵan tótenshe jaǵdaıdan keıin jumysyn bastaǵan qalalyq halyqqa qyzmet kórsetý ortalyqtarynda koronavırýs pandemıasyna baılanysty ózine-ózi qyzmet kórsetý sektorlarynyń jumysy shektelgen. QR Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsınniń tapsyrmasymen bul aımaqtardyń jumysy qaıta jandandy, dep habarlaıdy Qamshy.kz aqparat agenttigi "Azamattarǵa arnalǵan úkimet" memlekettik korporasıasynyń" baspasóz qyzmetine silteme jasap.
Búginde respýblıkalyq jáne oblystyq mańyzy bar qalalarda 137 ózine-ózi qyzmet kórsetý ortalyǵy iske qosyldy. Onda azamattarǵa keńes berý úshin myńnan astam qyzmetker tartyldy. Kelýshiler ondaǵy kompúterler arqyly kerekti anyqtamalar men elektrondy qyzmetterdi óz betterinshe ala alady. Ózine-ózi qyzmet kórsetý sektoryndaǵy eń kóp alynatyn qyzmetterge ESQ rásimdeý, sottylyqtyń bolýy/bolmaýy týraly, narkologıalyq jáne psıhonevrologıalyq dıspanserlerdiń esebinde bolmaý týraly anyqtamalar alý, turǵylyqty jer boıynsha tirkelý jáne emhanaǵa tirkelý kiredi.
Esterińizge sala keteıik, karantın kezinde elektrondy qyzmetterdi alý úshin qalalardaǵy saýda oryndary, joǵary oqý oryndary, qala ákimdigi sıaqty azamattar kóp baratyn jerlerde 700-den astam egov buryshtary iske qosylǵan. Onda kompúter nemese ınternet baılanysy joq azamattar qajetti anyqtamalar men qyzmetterdi rásimdeıtin. Atalǵan buryshtar áli de qyzmetin jalǵastyrady.
Buǵan deıin tegin alýǵa bolatyn elektrondy qyzmetterdi aqyly túrde usynatyn mekemelerdiń jumysyna baılanysty azamattardyń shaǵymy kóbeıgen. Azamattarǵa arnalǵan úkimet memlekettik korporasıasy olardyń jumysyna esh qatysy joqtyǵyn jáne anyqtamalardy alý úshin bógde azamattarǵa jeke málimetterdi usyný qaýipti ekenin eskertedi.
Memlekettik korporasıa qaıta jandanǵan ózine-ózi qyzmet kórsetý aımaqtarynda barlyq sanıtarlyq normalardyń saqtalýyn qamtamasyz etedi. Sondaı-aq ózdiginen qyzmet alýshylarǵa betperde taǵyp, araqashyqtyqty saqtaý qajettigin eske salady.
Pikir qaldyrý