Parlamentte «Ólim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige ekinshi Fakúltatıvtik hattamany ratıfıkasıalaý týraly» Qazaqstan Respýblıkasy zań jobasy qaraldy, dep habarlady inbusiness.kz.

BUU-nyń 1966 jylǵy Azamattyq jáne saıası quqyqtary týraly halyqaralyq paktini damytý úshin qabyldanǵan ekinshi halyqaralyq qujat bizdiń elde  2005 jyly ratıfıkasıalandy.

Bul týraly Syrtqy ister mınıstri Muhtar Tileýberdi: «Qazaqstan táýelsizdikke qol jetkizgennen bastap  BUU men EQYU músheligi turǵysynda qabyldanǵan adam quqyqtary salasyndaǵy mindettemelerge sáıkes ólim jazasyn qoldanýdy birtindep tarqatý jáne qylmystyq zańnamany izgilendirý saıasatyn júrgizip keledi.

QR Tuńǵysh Prezıdenti - Elbasy Nursultan Nazarbaev  2003 jylǵy 17 jeltoqsanda Qazaqstan Respýblıkasynda ólim jazasyn qoldanýǵa moratorıı engizý týraly jarlyqqa qol qoıdy. Sáıkesinshe jazanyń bul túrin qoldaný tolyǵymen toqtatyldy. Jahandyq úderisterge belsendi yqpaldasý saıasatyn júrgizý, sondaı-aq álemdik obolúsıanıstik trendti nazarǵa ala otyryp 2019 jylǵy jeltoqsanda Prezıdent Qasym-Jomart Toqaev Qazaqstannyń ekinshi fakúltatıvti hattamaǵa qosylý rásimin bastaýdy tapsyrdy. Osylaısha prezıdenttiń jarlyǵyna sáıkes 23 qyrkúıekte BUU janydaǵy Qazaqstannyń turaqty ókili Qaırat Omarov ekinshi fakúltatıvti hattamaǵa qol qoıdy. Qazaqstan Respýblıkasynyń halyqaralyq sharttary týraly 2005 jylǵy 30 mamyrdaǵy zańynyń 11 babynyń 1 jáne 2 tarmaqtaryna sáıkes, ekinshi fakúltatıvti hattama ratıfıkasıalanýy tıis. Halyqaralyq qujatqa sáıkes qol qoıýshy elder ólim jazasyn qoldanbaý jáne óz zańnamasy sheńberinde ólim jazasynyń kúshin joıý úshin barlyq qajetti sharalardy oryndaý mindettemesin qabyldaıdy. Jalǵyz erekshelik soǵys ýaqytynda ólim jazasyn qoldaný týraly zańdy túrde rásimdelgen eskertpe bolǵan jaǵdaıda ruqsat etiledi», – dedi mınıstr. 

Onyń túsindirýinshe, Qazaqstan ólim jazasyn bir jaǵdaıda ǵana qoldaný quqyǵynan bas tartpaǵan.

«Qazaqstan Respýblıkasy ekinshi fakúltatıvtik hattamanyń 2-babyna sáıkes soǵys ýaqytynda jasalǵan áskerı asa aýyr sıpattaǵy qylmys úshin kináli dep tanylǵandarǵa soǵys ýaqytynda ólim jazasyn qoldaný quqyqyǵyn ózine qaldyrady, – dedi Muhtar Tileýberdi.