«Nur Otan»-nyń Respýblıkalyq saılaýaldy shtaby Pavlodar oblysyna keldi dep habarlaıdy partıa baspasóz qyzmeti.

Partıanyń saılaýaldy kún tártibi óńirdegi iri kásiporyndardyń biri «Qazaqstan Alúmınıi» jumysshylarymen kezdesýde talqylandy.

Taıaýdaǵy 5 jylda «Nur Otan» oblysta keminde 45 myń jańa jumys ornyn ashý, 100-den astam aýyldyń 45 myń turǵynyn sapaly aýyz sýmen qamtamasyz etý, 1,6 myń km avtojoldy jóndeý, áleýmettik muqtaj azamattarǵa 9 myń páter usyna otyryp, 2 mln. sharshy metr turǵyn úı salý sekildi jobalardy mindet etip qoıyp otyr.

Ekologıany jaqsartý maqsatynda qatty turmystyq qaldyqtar polıgondaryn salý jáne jyl saıyn ortasha alǵanda zıandy shyǵaryndylardy 3 myń tonnaǵa tómendete otyryp, kásiporyndardy jańǵyrtý josparlanýda.

Budan keıin muǵalimdermen kezdesýde saılaýaldy shtab músheleri bilim berý salasyn damytýdyń negizgi baǵyttaryn talqylady.

«Nur Otan» partıasy óńirde 83 mektep salý men kúrdeli jóndeýdi qamtamasyz etedi. Memleket basshysy Qasym-Jomart Toqaev partıanyń «Ózgerister joly: Ár azamatqa laıyqty ómir!» atty saılaýaldy baǵdarlamasynda atap kórsetkendeı, el boıynsha 800 jańa mektep salynady jáne shaǵyn qalalarda, aýdan ortalyqtary men aýyldarda qoldanystaǵy 5 myń mektep jańǵyrtylady. Daryndy balalardy anyqtaý jáne qoldaý kórsetý boıynsha jumys, onyń ishinde aýyldyq jerler qamtyla otyryp jalǵasady, olarǵa eldegi mamandandyrylǵan mektepterde oqý múmkindigi usynylady. Ásirese, muǵalim kásibiniń bedelin arttyrýǵa basa nazar aýdarylady. Pedagogtardyń jalaqysy 2 ese ósedi», - dep atap ótti saılaýaldy shtab jetekshisi Baýyrjan Baıbek.

Osy kúni partıa ókilderi Novochernoıarka aýylynyń turǵyndarymen kezdesti. Bir jyl buryn aýyldaǵy 16 kópqabatty úıde ortalyqtandyrylǵan jylýdyń bolmaýy máselesi sheshimin tappaı turǵan bolatyn. Osynaý uzaqqa sozylǵan jylytý qazandyǵyn salý máselesi partıalyq baqylaýǵa alynǵannan keıin bıyl aýyldaǵy 800 úı ǵana emes, sonymen birge mektep, aýrýhana jáne basqa da áleýmettik nysandar jylýmen qamtamasyz etildi.

Turǵyndardyń aıtýynsha, Chernoıarsk aýyldyq okrýgindegi túıtkildi máseleniń biri – aýyl ishindegi joldardyń sapasy. Osyny eskere otyryp, «Nur Otan» partıasy aýdandyq saılaýaldy baǵdarlamaǵa 19 aýyldaǵy, onyń ishinde Novochernoıarkadaǵy joldarǵa jóndeý júrgizýdi engizdi.

«Jalpy, Elbasy, partıa Lıderi Nursultan Nazarbaevtyń bastamasymen qolǵa alynǵan «Aýyl – El besigi» jobasynyń aıasynda óńirde 170 aýyl jańǵyrtylady. Saılaýaldy ýádelerimiz aıasynda el kóleminde 3,5 myńnan astam aýyldyń turǵyndary úshin ómir súrý standartyn kóterý josparlanýda», - dedi Baýyrjan Baıbek.

«Nur Otan» partıasynyń saılaý qory qarajaty esebinen tólendi.