«Nur Otan» óńirlerdegi saılaýaldy úgitti-nasıhat jumystaryn aıaqtady. Bir aıǵa taıaý ýaqytta «Nur Otan»-nyń Respýblıkalyq saılaýaldy shtaby elimizdiń barlyq 17 óńirin aralady.

Ár qala men aýdanda partıa ókilderi jastarmen, kásipkerlermen, dárigerlermen, muǵalimdermen, zeınetkerlermen, jumysshylarmen, agrarshylarmen, zıalylarmen kezdesip, ózekti máselelerdi talqylady. Partıanyń kózdegen maqsatyn, alǵa qoıǵan mindetteriniń oryndalýyna qandaı kepildikter beretinin túsindirdi.

«Nur Otan»-nyń úgit-nasıhat jumystary dabyra-daqpyrtsyz, mazmundy da qarqyndy ótti. 7 mıllıon saılaýshyny qamtyp, 28 myńnan astam is-shara uıymdastyryldy. Olardyń bári buqaralyq is-sharalar emes – naqty adamdarmen ózekti máselelerdi talqylaýǵa arnalǵan taqyryptyq kezdesýler. Ýaqytymyzdyń 80%-in azamattardyń saýaldaryna jaýap berýge arnadyq», - dedi saılaýaldy shtab jetekshisi Baýyrjan Baıbek.

Onyń aıtýynsha, «Esikten esikke» aksıasy aıasynda jasotandyqtar 1,4 mln. úı men páterlerdi aralap, 6,2 mln. úgit materıaldaryn taratqan. Óńirlerde qoǵamdyq qabyldaýlar qyzý jumys istep, 95 myńnan astam ótinish tústi. Olardyń úshten biri – usynystar men amanattar.

Búgin Respýblıkalyq saılaýaldy shtab músheleri elorda turǵyndarymen júzdesti.

Atap aıtqanda, «Astana – Jańa qala» EEA Indýstrıaldyq parki kásiporyndarynyń basshylarymen jáne «Modex Astana» modýldi úı salý zaýytynyń ujymymen kezdesýde partıanyń saılaýaldy baǵdarlamasy aıasynda qalany damytýdyń negizgi baǵyttaryn tanystyrdy.

Aldaǵy 5 jylda elordada áleýmettik muqtaj azamattarǵa 50 myń páter berý usynylyp, 10 mln. sharshy metr turǵyn úı salý josparlanýda. Sondaı-aq, 50 jańa mektep salý jáne 250 kóshege jóndeý júrgizý kózdelip otyr. Qala shetindegi 20 myń úıdi gazdandyrý qolǵa alynady.

Budan keıin partıa músheleri «Nazarbaev Ýnıversıtet» ǵalymdarymen jáne «Jas Otan» belsendilerimen kezdesý ótkizdi.

«Memleket basshysy Qasym-Jomart Toqaev kúni keshe ǵana jaryq kórgen «Táýelsizdik bárinen qymbat» maqalasynda «jastar – qashanda tyń ıdeıalardyń qaınar kózi, oń ózgeristerdiń qozǵaýshy kúshi» dep atap ótken bolatyn. Osyǵan oraı Prezıdent bastamasymen talantty jastardy qoldaý maqsatynda «Táýelsizdik urpaqtary» granty taǵaıyndalady. Sondaı-aq, Elbasy, partıa Lıderi Nursultan Nazarbaevtyń tapsyrmasymen joǵary bilim alý granttaryn 50%-ke kóbeıtý kózdelip otyr. Jyl saıyn 75 myń jas qazaqstandyq tegin joǵary bilim alý múmkindigine qol jetkizedi. Kolejder men ýnıversıtetterdiń jataqhanalarynda kem degende 50 myń jańa oryn paıdalanýǵa beriledi», - dedi partıa Tóraǵasynyń birinshi orynbasary.

180 kolejdiń materıaldyq-tehnıkalyq bazasyn jańartý sharalary júzege asyrylady. Stýdentter stıpendıasy 2 ese, magıstranttar men doktoranttardiki – 1,5 ese ósedi. «Nazarbaev Ýnıversıtet» úlgisi boıynsha 2 óńirlik joǵary oqý ornyn salý josparlanýda.

Ǵylymdy qoldaý men zıatkerlik áleýetti damytý maqsatynda jas ǵalymdarǵa jyl saıyn 1000 grant bólinedi. Sonymen birge jyl saıyn álemniń jetekshi ǵylymı ortalyqtaryna 500 qazaqstandyq ǵalym taǵlymdamaǵa jiberiledi.

Baspasóz qyzmetiniń habarlaýynsha, partıanyń saılaýaldy baǵdarlamasy 255 naqty shara men 160 ındıkatordan turady, olardyń bári jan-jaqty eseptelgen, qarjylyq jáne naqty resýrstarmen qamtamasyz etilgen.

«Qurmetti qazaqstandyqtar! Biz áleýmettik ál-aýqatty arttyrýǵa, bıznesti qoldaýǵa, sondaı-aq ekonomıkada jańa ınfraqurylymdy qurýǵa, óńirlerdi damytýǵa jáne aýyldardy jańǵyrtýǵa baǵyttalǵan ózgerister jolyn usynyp otyrmyz. Koronavırýs jaǵdaıyndaǵy daǵdarysta tek «Nur Otan» ǵana adamdardyń kóńiline senim uıalatyp, naqty istermen qıyndyqty eńserýdiń jolyn kórsetýde. Biz muǵalimder men dárigerlerdiń jalaqysyn, stýdentterdiń stıpendıasyn kóteremiz, zeınetaqy men áleýmettik járdemaqylardy ındeksasıalaımyz, jańa mektepter, aýrýhanalar men joldar salamyz, jańa jumys oryndaryn ashamyz. Maqsaty aıqyn, naqty ister partıasy – «Nur Otan»-ǵa daýys berińizder!»,- dep túıindedi Baýyrjan Baıbek.

«Nur Otan» partıasynyń saılaý qory qarajaty esebinen tólendi.