Boksshy Ermahan Ibraımov Instagram paraqshasynda 10 qańtarda Almatyda Táýelsizdik alańynda ótken mıtıńke ne úshin barǵanyn jáne onda bolǵan jaǵdaıǵa baılanysty túsinikteme berdi. 

"Assalaýmaǵaleıkúm, qurmetti Qazaq eli jáne almatylyqtar!!!

Men, Ibraımov Ermahan Saǵıuly, 10.01 kúni Táýelsizdik alańynda bolǵan jaıtqa qysqasha aqparat berip keteıin.

Qurmetti, otandastar!!! Osy ýaqytqa deıin men halqymmen birge boldym jáne áli de birge bolatynymdy aıtqym keledi. Mıtıń kezinde narazylyq bildirgen halyqqa kúsh kórsetý maqsatynda emes, sabyrǵa shaqyrý úshin barǵan bolatynmyn. Biraq, qarsy toptardyń belsendileri maǵan keri pikir bildirip, meniń jeke namysyma tıetin sózder aıtyp jatqasyn, jaqyndap baryp, bárin túsindirmekshi boldym. Sol tusta qarsy toptardyń arandatýshylary meni kadrǵa alyp, túrli baǵytta aqparattar taratyp jibergen bolatyn.

Iá, áleýmettik jelilerde sýretim men vıdeo tarap ketip, maǵan keri pikirler aıtylýda. Onyń bárin synı turǵyda qabyldaımyn.

Alaıda men osy saılaýǵa qatysýymnyń sebebi de qarapaıym halyq úshin ekenin taǵy da aıtqym keledi. Sebebi tóbeme kóterip, qurmettegen halyqqa qarsy shyǵý meniń oıymda da bolmaǵan!

Sondyqtan qadirli qazaq eli, mıtıń kezinde bolǵan jaǵdaıdy qysqasha osylaı túsindirgim keledi. Barlyǵy alda. El múddesi úshin alda áli de ıgilikti isterdi atqaratyn bolamyn.

Qurmetpen, Ibraımov Ermahan Saǵıuly!," dep jazdy sportshy.