Qazaqstanǵa sheteldik jumys kúshin tartýǵa jyl saıynǵy kvota jumys berýshilerdiń qajettiligi negizinde bıyl respýblıkadaǵy jumys kúshiniń sanyna qatysty 0,31%-dy nemese 29,3 myń birlikti qurady. Búgingi kúni 1,7 myń kásiporynda 14,6 myń sheteldik azamat jumys isteıdi, bul rette uıymdardaǵy qazaqstandyq qyzmetkerlerdiń úlesi 96%-dy quraıdy, dep habarlady QR Eńbek jáne halyqty áleýmettik qorǵaý mınıstrligi.

2021 jyly sheteldik jumys kúshin tartýǵa berilgen ruqsattardyń ishinde kelesi sanattar bar: birinshi sanat boıynsha 1 354 ruqsat (basshylar jáne olardyń orynbasarlary), ekinshi sanat boıynsha 7 510 ruqsat (qurylymdyq bólimshelerdiń basshylary). Tartylǵan SHJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe 12 235 adam jáne 4 170 adam. Sondaı-aq maýsymdyq jumystarǵa 2 976 adam tartyldy.

Byltyr memleket basshysynyń tapsyrmasyn oryndaý úshin, ishki eńbek naryǵyn bilikti emes sheteldik jumys kúshinen qorǵaý jáne qazaqstandyqtarǵa jumys oryndaryn saqtaý úshin SHJK tartý kvotasy 2019 jylmen salystyrǵanda 40%-ǵa qysqartyldy, bul rette jumys berýshilerdiń tapshy mamandyqtarǵa qajettiligin óteı aldy.

2020 jyly jergilikti atqarýshy organdar SHJK tartý úshin 17,3 myń birlik (bekitilgen kvotanyń 59%) mólsherinde jumys berýshilerge ruqsat berdi jáne uzartty.

2020 jyly SHJK arasynan 30-dan astam adamdy tartatyn kásiporyndarǵa 71 tekserý júrgizildi, bul 608 buzýshylyqty anyqtaýǵa múmkindik berdi.

Tekserý nátıjeleri boıynsha jumys berýshilerge 113 uıǵarym berildi, 8,4 mln teńgeden astam somaǵa 50 ákimshilik is qozǵaldy. Júrgizilgen jumystardyń qorytyndysy boıynsha SHJK tartýǵa 32 ruqsat keri qaıtaryp alyndy.

2019 jylmen salystyrǵanda 2020 jyly Eńbek jáne kóshi-qon zańnamasyn buzý sany azaıdy (1006-dan 608 jaǵdaıǵa deıin), sondaı-aq eńbekaqy tóleýdegi sáıkessizdik 479 jaǵdaıdan 1-ge deıin qysqardy.