Dúnıejúzilik densaýlyq saqtaý uıymynyń ǵalymdary koronavırýstyń taralýy men shyǵýyn zertteý úshin Qytaıdyń Ýhan qalasyna keldi, dep habarlady 24.kz.

10 adamnan quralǵan sarapshylar toby bir aıǵa jýyq ýaqyt boıy zertteý jumyspen aınalysady. Arasynda AQSH, Avstralıa, Germanıa, Japonıa, Ulybrıtanıa, Reseı, Nıderland, Katar men Vetnam elderiniń vırýsologtary bar. Alaıda iske kirispes buryn mamandar aldymen karantınde otyryp shyǵýy kerek. Dese de, keı jumystar qytaılyq ǵalymdarmen vıdeobaılanys arqyly qashyqtan pysyqtalady.

Aıta keteıik, kúni búginde deıin jer jahandy jaılaǵan koronavırýstyń shyǵý sebebi jaıynda túrli boljam keltirildi. Bastapqyda vırýs Qytaıdyń Ýhan qalasynnan taraldy delinse, keıin aýrýdyń Qytaıda tirkelmeı jatyp, Eýropada shyqqany jaıly da málimdemeler jasaldy. Endi ǵalymdar vırýstyń adamǵa alǵash qalaı juqqanyn anyqtaý úshin kúsh biriktirdi.

Margaret Harrıs, Dúnıejúzilik densaýlyq saqtaý uıymynyń ókili:

– Ǵalymdar óte kúrdeli jumys atqarmaq. Janýarlar men adamdarǵa juqqan vırýsty tolyq zertteý úshin Qytaıdyń Ýhan qalasyna attandy. İndetti eń alǵashqy juqtyrǵan turǵyndarmen kezdesip, olardyń qaıda barǵanyn, kimmen qarym-qatynasta bolǵanyn anyqtaıdy. Zerthanalyq jumystarmen de jaqyn tanysady. Bul kúlli álemge ortaq másele bolǵandyqtan, túrli elderdiń ǵalymdary birlese jumys istep otyr. Osynyń arqasynda az ǵana ýaqyt ishinde vaksına shyǵaryldy. Munyń bári tyǵyz yntymaqtastyqtyń nátıjesinde júzege asqan is.