Úndistannyń batysynda ornalasqan álemdegi eń iri vaksına daıyndaıtyn Serým ınstıtýty órtke orandy.

Órt qurylysy aıaqtalmaǵan ǵımaratta bastalǵan. Kompanıa qyzmetkerleriniń aıtýynsha, órt vaksınaǵa zıan tıgizbedi. Órttiń shyǵý sebebi áli belgisiz. Órt saldarynan bes adam qaza tapty.

"Biz qazir ǵana qaıǵyly jańalyqty estidik. Adam shyǵyny bar eken. Qaıtys bolǵan adamdardyń otbasyna qaıǵyryp kóńil aıtamyz", dep jazdy ınstıtýt basshysy Adar Ponaýala (Adar Poonawalla) tvıtter paraqshasynda.

Instıtýt basshysy órt  jergilikti turǵyndarǵa "Kovısheld" ataýymen tanymal  (Covishield) Oksford-Astrazeneka (Oxford-AstraZeneca) vaksına óndirisin toqtata almaıtynyn da atap ótti. Sebebi tótenshe jaǵdaı úshin arnaıy qosymsha ǵımarattar salynǵanyn jetkizdi. Halyqty Oksford-Astrazeneka vaksınasymen vaksınasıalaý ótken aptada bastaldy.

Tamyzdyń basyna deıin 300 mıllıon adamǵa vaksına salý josparlanǵan. Oksford-Astrazeneka vasınasyn basqa elder de Serým ınstıtýtynda jasaıdy.

Úndistan koronavırýs ınfeksıasymen aýyrǵandar men odan qaıtys bolǵan adamdar sany boıynsha AQSH-tan keıin ekinshi oryn alady. Djon Hopkıns ýnıversıtetiniń málimetine sáıkes, Úndistanda pandemıa bastalǵannan beri 10.6 mıllıon adam koronavırýspen aýyrǵan. 153 myń adam koronavırýstan qaıtys boldy.