Qumash telegramm kanalynda Shymkent qalasynyń turǵyny Álıa Mamýtovanyń QR prezıdenti Qasym-Jomart Toqaevqa vıdeo ótinishi jarıalandy. Onda áıel qyzyna qatysty zorlyq jasaǵan adamdardy jazalaýdy suraıdy.

Álıa Mamýtova úsh balany tárbıelep otyr. Úsh balanyń biri 1 toptaǵy múgedek. Tolǵanaı esimdi qyzy 1992 jyly dúnıege kelgen. Týmasynan múgedek. Ýaqyt óte kele talma aýrýy qosylǵan. Jalǵyz basty ana otbasynyń jalǵyz asyraýshysy bolǵandyqtan 2011 jyly qyzy Tolǵanaıdy №2 múgedekter ınternatyna ótkizýge májbúr bolǵan.

2020 jyly ol qyzyn kórýge barǵanda qyzy mazasyzdanyp turǵanyn aıtady.

 «Nege mazań joq dep surasam, «Maǵan osy jazda bir aǵaı men apaı dáriger endi ýkol salmaımyz, bir-aq ret spırál salamyz boldy» dep suq saýsaǵymen kórsetti. Kezekshiden basshylardyń birin shaqyrýyn surap edim jeksenbi kúni basshylardan eshkim bolmaıtynyn aıtyp Gúlmıra esimdi psıhologty shaqyrdy. Psıhologtan  spırál týraly suraǵanymda, barlyǵyn rastady. Budan bólek 43 qyzǵa salynǵanyn da aıtty. «Eger spırál salmasaq bular eki qabat bolyp qala beredi» degende  ústime muzdaı sýdy quıyp jibergendeı boldy», - dep eske aldy Tolǵanaıdyń anasy.

«Internatta jatqandardyń barlyǵy birinshi top  ekinshi top múgedegi. Bular kimnnen jáne qalaı eki qabat bolyp qalady? Nege bular jasyryn spırál salady? Ne úshin salady? Biz nege bilmeımiz? 43 qyzdyń ata-anasy da bilmeıdi. Qyzym aıtpaǵanda men de bilmeıtin edim», - deıdi Álıa Mamýtova.

Shymkent qalasynyń turǵyny shaǵymdanbas buryn bárne kóz jetkizbek bolǵan. 2020 jyldyń 9 qarashasynan 19 qarashasyna deıin qyzy Tolǵanaıdy medısınalyq ortalyqqa aparyp teksertpekshi bolǵan. №2 ınternattyń dırektor orynbasarynan bastap, medısına qyzmetkerlerine deıin karantın eknenin aıtyp, qyzyn ınternattan jibermegen.

Álıa Mamýtova departamentke barǵanyn aıtady. Onda 13 adamnan turatyn komıassıa qurylyp, №2 ınternatta tekserý jumystary júrgizilgen. Tekserý nátıjesinde 2011 jyly Tolǵanaıdyń kartasynda «qyz» dep jazylǵanyn, al 2012 jyly «spırál salynǵan» dep jazylǵany anyqtalǵan.

Tolǵanaıdyń anasy 19 qarashada shaǵym túsiredi. 2020 jyldyń 21 qarashasynda tergeý bastalǵan. Álıa Mamýtovanyń aıtýynsha, tergeý júrgizilip jatqan joq. Odan shý shyǵarmaýyn da suraǵan.

«Men budan artyq shydaı almaımyn. Osy oqıǵadan keıin adamdardan surastyra bastadym. Osyndaı mekemelerde mundaı sumdyqtar bolyp kelgen. Dáleldeı almaǵan adamdar kóp. Men bul sumdyqty, aıýandyqty kórip turyp úndemeı otyra almaımyn. Kóshede ıtti taıaqpen zorlaǵan adam sottalyp jatqanda men nege múgedek qyzymnyń aryn qorǵaı almaımyn. Nege múgedekke osyndaı aıýandyq isteıdi», - dedi Álıa Mamýtova.