QR Densaýlyq saqtaý vıse-mınıstri Erlan Qıasovtyń qaýlysymen el turǵyndaryn koronavırýsqa qarsy vaksınasıalaý boıynsha qaýly bekitildi, dep habarlady inform.kz.

Atalǵan qaýlyǵa sáıkes, birinshi kezekte koronavırýs juqtyryp alý qaýpi joǵary sanatqa kiretin adamdarǵa vaksınasıa jasalady. Olar:

– medısına qyzmetkerleri, birinshi kezekte ınfeksıalyq aýrýhanalar, jedel medısınalyq kómek, reanımasıa jáne terapıa bólimsheleri, alǵashqy medısınalyq-sanıtarlyq kómek kórsetetin densaýlyq saqtaý uıymdary, stasıonarlyq kómek kórsetetin densaýlyq saqtaý uıymdarynyń qabyldaý bólimderi personaldary, sanıtarlyq-epıdemıologıalyq qyzmet mamandary;

– pedagogter, ýchaskelik polısıa qyzmetkerleri;

– stýdentter, medısınalyq-áleýmettik jáne jabyq balalar mekemeleriniń qyzmetkerleri men kontıngenti;

– tótenshe jaǵdaı qyzmetteriniń, Qorǵanys, İshki ister mınıstrlikteriniń, Ulttyq qaýipsizdik komıtetiniń, QR Memlekettik kúzet qyzmetiniń qyzmetkerleri;

– QR Prezıdenti İs basqarmasynyń kontıngenti, memlekettik qyzmetshiler, Qazaqstanda tirkelgen dıplomatıalyq, konsýldyq mekemelerdiń qyzmetkeri sanalatyn QR azamattary, ulttyq qurama komandalardyń músheleri;

Aldyn alý ekpelerine turaqty jáne ýaqytsha medısınalyq qarsy kórsetilimi bar adamdarǵa, KVI-diń ótkir jáne sımptomsyz túrimen aýyrǵandarǵa vaksınasıa salynbaıdy. Koronavırýspen aýyrǵandarmen qarym-qatynasta bolǵandarǵa karantın merzimi ótkennen keıin ǵana ekpe salynady. Qaýlyda sondaı-aq vaksınany saldyrýǵa qarsy kórsetilimder belgilengen.

Eske salaıyq, Qazaqstanda 1 aqpanda Gam-KOVID-Vak («Spýtnık V») reseılik vaksınasyn egý bastalady.