Almaty ákimdigi 8 naýryz – Halyqaralyq áıelder kúni marsh ótkizýge ruqsat berdi. Bul týraly áıelder marshyn uıymdastyrýshy toptardyń biri Feminita jelidegi paraqshasynda habarlady, dep jazady centralasian.org.

Toptyń málimetinshe, marshty Feminita tobymen birge "QazFem", "FemSreda", SVET qory men FemAgora uıymdastyrady. Málimdemede sherý "Shevchenko kóshesin boıynda, Gandı eskertkishinen Shoqan Ýálıhanov eskertkishine deıin ótetini" jazylǵan.

"Ókinishke qaraı, beıbit mıtıń zańy sherý ótkizetin oryndy tańdaýǵa múmkindik bermeıdi" deıdi uıymdastyrýshylar. Femınıstik toptar mıtıńige qajetti qarjyny jınaý úshin kraýdfandıng bastamaq.

2020 jyly 8 naýryzda Almatyda ótken áıelder marshyna 200-den adam qatysqan. Shara kezinde qatysýshylar "Árbir áıel mańyzdy" degen jazýy bar gúl shoǵyn órtegen. Polısıa muny "buzaqylyq" dep taýyp, marshtyń eki qatysýshysyna aıyppul salǵan.

Sol kezde halyqaralyq Human Rights Watch uıymy Qazaqstan bıliginen eki belsendige shyqqan aıyppul sheshimin joıýdy talap etken. HRW belsendiler "pikirin erkin aıtý quqyǵynyń aıasynda qoǵamǵa esh qaýip tóndirmeıtin áreketi úshin" jazalandy degen.

Bıyl ótetin marsh Qazaqstanda qabyldanǵan "Beıbit mıtıń týraly" jańa zań aıasynda ótpek. Nur-Sultan qoǵamdaǵy synnan soń mıtıń zańyn ózgertip, halyqtyń pikir aıtýyna jol ashamyz dep ýáde etken. Biraq sarapshylar jańadan qabyldanǵan beıbit mıtıń zańynda kedergiler sol kúıi qaldy dep sanaıdy. Áli kúnge beıbit mıtıńige ruqsat alý qıyn.

Bılik ruqsat etilmegen mıtıńige shyqqandardy kúshtep ustap, ákimshilik jaýapqa tartady.

Eýroparlament 11 aqpanda Qazaqstanǵa qatysty qabyldaǵan qararynda bılikten beıbit mıtıńige kedergi keltirmeı, zańdy qaıta ózgertýge shaqyrdy.