Bir top Mehıko turǵyndary Meksıkadaǵy Qazaqstan elshiligine habarlasyp, qazaq tilin úıretetin kýrs ashýdy suraǵan. Bul týraly jeli qoldanýshysy Erkin Baıǵabyluly facebook paraqshasynda jazdy.
"Dıplomattarymyz qazaq tilin úırenýge degen qyzyǵýshylyqtyń sebebin surasa:
– Dımashtyń fanatymyz, jaqsy kóretin ánshimizdiń ana tilin úırengimiz keledi, – dep jaýap beripti.
Budan keıin elshilik dereý 3 aılyq qazaq tili kýrsyn uıymdastyrady. Mehıkolyqtar qazaq tilin ıspan tilinde túsindirip oqytýdy suraıdy. Sátine qaraı, dıplomattarymyz Nazarbaev ýnıversıtetinde qyzmet atqaratyn qazaq tilin úırenip alǵan meksıkalyq Sandra Abıla atty boıjetkendi taýyp, kýrsty júrgizý jóninde ótinish bildirgen. Ol úsh aı boıy 100-ge jýyq mehıkolyqtarǵa qazaq tilin úıretedi.
Endi olar elshiliktiń qyzmetkeri Alǵash Ospanovqa habarlasyp, qazaq tili kýrsy jyl boıy ótse degen ótinish aıtyp jatyr eken. Osyǵan oraı dıplomat álemniń 24 iri qalasynda qazaq tilin úıretý synybyn uıymdastyrǵan "Otandastar qorynyń" mamandarymen keńesip, birlesken kýrs ashýdy uıymdastyrýǵa kirisip ketti.
Mine, ónerdiń qudireti degen osy shyǵar. Biz myna jaqta mınıstrlerimizdi qazaqsha sóılete almaı júrsek, Dımashymyzdyń arqasynda sonaý Soltústik Amerıkadaǵy mehıkolyqtar ana tilimizdi úırenip jatyr. Soǵan qaraǵanda, olar Dımashtyń sol qurlyqqa baramyn degenin de bilip alǵan syńaıly. Bir kem dúnıe..." delingen jazbada.
