Almaty qalasy ákimdiginiń bastamasymen qala ákiminiń orynbasary Muhıt Ázirbaevtyń qurylys kompanıalary ókilderimen jáne qurylys salýshylarmen onlaın rejıminde kezdesýi ótti. Kezdesýge Almaty qalasy áleýmettik qamsyzdandyrý departamentiniń basshylyǵy qatysty.

Negizgi mindet - jumysshylardyń eńbek quqyqtarynyń saqtalýyn qamtamasyz etý máselesin qarastyrý. Atap aıtqanda, jalaqy deńgeıiniń sáıkestigi, medısınalyq saqtandyrýmen qamtý jáne t.b.

Munara kran operatorlarynyń jumysyn retteý máselesi boıynsha Bazis Construction, BI Group, Dial-Stroy, Nest Stroy, Esentai Stroy, Qazaq stroy, Exclusive, Atrix-Stroy jáne basqa da kompanıalardyń ókilderi tyńdaldy. Esterińizge sala keteıik, kranshylardyń negizgi talaptary - jalaqyny 800 myń teńgege deıin kóterý, erlerdiń zeınet jasyn 60 jasqa, áıelderdi 55 jasqa deıin tómendetý. Búgingi kúni birqatar qurylys kompanıalarynyń málimetteri boıynsha kran operatorynyń jarty aılyq jalaqysynyń mólsheri shamamen 285 myń teńgeni quraıdy. Jumys ýaqytynan tys tóleý tetigi engizilýde.

Kásiporyn basshylarymen jalaqynyń keshiktirilýi jaǵdaılarynyń aldyn alý maqsatynda túsindirme áńgime júrgizildi. Búgingi kúni, Áleýmettik ál-aýqat basqarmasynyń aqparaty boıynsha, iri jumys berýshi kompanıalarda jalaqy boıynsha qaryz joq. Alaıda, shaǵymdardyń kópshiligi qosalqy merdigerler arqyly jumys isteıtin munara kran operatorlaryna qatysty. Osy baǵytta tıisti jumystar da júrgizilip jatyr.

Otyrys nátıjesinde qatysýshylar kran operatorlarynyń ótinishi negizinde qurylys salýshy kompanıalardy tıisti qyzmetterdi tarta otyryp, eńbek zańnamasynyń saqtalýyn, jumysshylardyń quqyqtarynyń saqtalýyn tolyǵymen tekserýge sheshim qabyldady. Aǵymdaǵy jaǵdaıdy talqylaý jáne zań buzýshylyqtardyń aldyn-alý boıynsha osyndaı kezdesýler apta saıyn ótkiziletin bolady.

Buǵan deıin qala ákimdigi memlekettik baǵdarlamalar boıynsha qurylys júrgizip jatqan qurylys kompanıalaryna monıtorıń júrgizgen. Ákimdik pen qurylys salýshylardyń ókilderi bastamashyl toppen 15-20 adamnan turatyn jınalys ótkizdi (kran operatorlary). Barlyq usynystar men talaptar tyńdaldy.