Reseı ǵarysh agenttiginiń basshysy "Vashıngton Reseıdiń jer serigin ushyrýǵa kedergi keltirgen sanksıalaryn alyp tastamasa, Máskeý Halyqaralyq ǵarysh stansıasynan shyǵyp ketedi" dedi.

Reseı prezıdenti Vladımır Pýtın men AQSH prezıdenti Djo Baıdenniń osy aıdyń sońynda Jenevada ótetin samıtti qarsańynda Roskosmos basshysy Dmıtrıı Rogozın Reseı dýmasyndaısóz sóıledi.

Rogozın Máskeý óziniń keıbir jerserikterin ushyra almaı jatqanyn aıtty. Onyń sózinshe, AQSH-tyń sanksıalaryna baılanysty Reseı óziniń ǵaryshtyq baǵdarlamasyna qajetti keıbir mıkrochıpter jıyntyǵyn ımporttaı almaı otyr.

– Bizde zymyrandar jeterlik, biraq olardy ushyratyn eshteńe joq, – degen Rogozın Batys sanksıalary Reseıdegi belgili bir salanyń damýyna aıtarlyqtaı kedergi keltirip jatqanyn moıyndady. 

– Bizde ǵarysh apparattary negizinen tolyq qurastyrylady, biraq sanksıalarǵa baılanysty qajetti jáne naqty mıkrochıpter jıyntyǵyn satyp ala almaımyz, – dedi ol.

Reseı 2014 jyly Qyrymdy Ýkraınadan anneksıalap alǵannan keıin Amerıka Qurama Shtattary jáne basqa da batys elderi Máskeýge sanksıalar sala bastady. Jaqynda AQSH Máskeýge prezdenttik saılaýǵa aralasýy, kıbershabýyldar men Kreml synshysy Alekseı Navalnyıdyń ýlanýyna baılanysty sanksıa salǵan. 

– Eger Vashıngton jaqyn arada Reseıdiń ǵarysh merdigerlerine qarsy sanksıalardy alyp tastamasa, Reseı 2025 jyly Halyqaralyq ǵarysh stansıasynan (HǴS) shyǵýy múmkin, – dep málimdedi Rogozın.

1998 jyly bastalǵan HǴS kóp memleket qatysqan joba jáne eki segmentten turady: AQSH jáne basqa ǵarysh agenttikteri bir bóligin paıdalanady, al ekinshi bóligin Reseı ǵaryshkerleri qoldanady.

AQSH-tyń ǵarysh agenttigi NASA kem degende 2030 jylǵa deıin HǴS-ny paıdalanýdy qoldaıdy. NASA basshysy Bıll Nelson ótken aptada CNN-ge "Reseıdiń HǴS-dan shyǵýy Reseı jáne Qytaıdyń AQSH-qa qarsy jańa ǵaryshtyq básekesin týdyrýy múmkin" dep málimdegen.

Osy jyldyń basynda AQSH prezıdenti Djo Baıden óziniń reseılik áriptesi Vladımır Pýtındi "kıller" dep atap, Reseıge, onyń ishinde valúta-qaryz naryǵyna sanksıalar salǵannan keıin, Máskeý men Vashıngton arasyndaǵy qatynastar qyrǵı-qabaq soǵystan keıingi eń shıelenisti deńgeıge jetken.