Mańǵystaý oblysynyń ákimi Serikbaı Trumov óńirdegi qýańshylyqqa baılanysty mal basyn saqtap qalý maqsatynda jasalyp jatqan jumystar jaıynda baıandady. QR Prezıdenti janyndaǵy ortalyq komýnıkasıalar qyzmetinde ótken baspasóz konferensıasynda oblys basshysy mal azyǵy qoryn molaıtý úshin jergilikti búdjetten 200 mln. Teńgeden astam qarajat bólingenin aıtty.

«Bıyl qysta qardyń, kóktemde jaýyn-shashynnyń túspeýi – mal ósirip otyrǵan sharýalarǵa qıyndyq týdyryp otyr. Osyǵan oraı arnaıy jumys toby quryldy. Ólkeniń jeke sharýashylyqtaryn mal azyǵymen qamtamasyz etý úshin jaqyn ornalasqan Aqtóbe oblysymen kelissózder júrgizildi. Onyń ishinde mal azyǵyn qajetti mólsherde jetkizýge jáne Mańǵystaý oblysynyń sharýashylyqtaryna jaıylymdyqqa, shabyndyqqa jer ýchaskelerin berýge kelisildi. Búgin kúni bul jumystardy bastap kettik. Jergilikti búdjetten mal azyǵy qoryn qalyptastyrý maqsatynda 200 mln. tg astam qarajat bólindi. Kórshi oblystardan tıelgen jem-shóp óńir sharýalaryna jetkizilýde», - dedi S. Trumov.

Sonymen qatar, oryn alǵan jaǵdaıǵa baılanysty quramynda Aýyl sharýashylyǵy, Ekologıa mınıstrligi ókilderi, Májilis depýtattary respýblıkalyq «Qazgıdromed» basshysy, jergilikti atqarýshy organdardyń qyzmetkerlerinen turatyn arnaıy jumys toby qurylyp oblystyń qazirgi jaǵdaımen tanysty, jergilikti halyqpen kezdesti. Nátıjesinde memlekettik qoldaýlarǵa ózgerister engizý, Úkimet tarapynan qoldaý kórsetý qajettigi boıynsha usynys berilip jumys jalǵasýda. Osy jumystar aıasynda «Azyq túlik kelisim-shart korporasıasy» AQ arqyly 1700 tonna arzan baǵada arpa aldyrý josparlanyp otyr.

«Qazgıdromet» RMK málimetinshe, Mańǵystaýda jaýyn-shashynnyń mólsheri qajetti normanyń 17% qurap otyr.