Koronavırýs ınfeksıasynyń órshýine baılanysty Almaty "qyzyl" aımaqta. Sanıtarlyq-epıdemıologıalyq jaǵdaıǵa baılanysty Qurban aıt merekesi boıynsha barlyq is-shara onlaın formatta ótedi.

Óńirlik komýnıkasıalar qyzmetinde ótken baspasóz konferensıasynda Almaty qalasynyń Bas ımamy O. Tólebı, Ortalyq meshittiń naıb ımamy R. Qaıyrgeldi, qalalyq Sanıtarlyq-epıdemıologıalyq baqylaý departamentiniń basshysy ári qalanyń Bas memlekettik sanıtarlyq dárigeri J. Bekshın Qurban aıt merekesinde qurbandyq shalý boıynsha is-sharalardy uıymdastyrý ári ótkizýdiń erejeleri týraly habarlady.

Almatyda sanıtarlyq-epıdemıologıalyq jaǵdaı kúrdeli. Naýqastar sanynyń ósýine mýtasıalanǵan delta shtamynyń bolýy áser etýde. Osyǵan oraı Qurban aıt merekesi bıyl 20 shildede onlaın formatta ótedi.

Eske salsaq, Almaty qalasy ákiminiń orynbasary Erjan Babaqumarov Qurban aıt merekesine qatysty ótken keńeste qalalyq basqarmalar men aýdandardyń ákimdikterine, veterınarlyq jáne tıisti qyzmetterge mereke kezinde ınfeksıanyń aldyn-alý jáne karantındik shekteýlerdiń saqtalýyna baqylaýdy kúsheıtý jóninde qajetti sharalar qabyldaýdy tapsyrdy.

Qurban aıt merekesi kezinde KVI-diń odan ári taralýyna jol bermeý úshin Almatynyń Bas memlekettik sanıtarlyq dárigeri Jandarbek Bekshın jergilikti memlekettik organdardyń ókilderi men Almaty qalasy Ortalyq meshitiniń bas ımamyna Qurban aıt merekesi kezinde qatań karantındik sharalardy saqtaýdy tapsyrdy.

"Qalada koronavırýs ınfeksıasynyń kúrt órshýine baılanysty adam kóp jınalatyn is-sharalardy, onyń ishinde uıymdarda, sondaı-aq jeke menshik úı men medreselerde aıt namazyn ótkizýge tyıym salynady", – dedi Jandarbek Bekshın.

Almaty qalasy Ortalyq meshitiniń ımamy O. Tólebıdiń aıtýynsha, kúrdeli epıdemıologıalyq jaǵdaıǵa baılanysty qala meshitterinde Qurban aıt namazy oqylmaıdy.

"Aıt namazynyń ornyna úıde eki rákat nápil namazyn oqý usynylady", – dedi ımam.

Qurbandyq shalý rásimi qurban2021.kz saıtyna tapsyrys bere otyryp, onlaın rejımde ótedi. Almaty qalasynyń Bas ımamy Ospan Tólebıdiń aıtýynsha, qurbandyq shalý rásimine ótinimder 15-i men 22 shilde aralyǵynda saǵat 14.00-ge deıin qabyldanady.

"Bıyl Almaty qalasynda Qurban aıt merekesi kezinde 1108 usaq jáne 50 iri qara mal qurbandyqqa shalynady dep josparlanýda. Qurbandyq eti 5 545 muqtaj otbasy men 14 mekemege bólinedi", – dedi O. Tólebı.

SOVID-19 epıdemıasy jaǵdaıynda Qurban aıt merekesin uıymdastyrý máselelerin halyqqa túsindirý maqsatynda Ortalyq meshitimen birlesip Call-ortalyqtyń jumysy uıymdastyryldy. Qurban aıtqa qatysty barlyq suraqtar boıynsha myna nómirlerge habarlasýǵa bolady: 8 (727) 329 09 66, 8 778 382 88 36 nemese WhatsApp nómiri boıynsha – 8 775 475 00 83.

Eske salsaq, Bas memlekettik sanıtarlyq dárigerdiń qaýlysyna sáıkes, Almaty aýmaǵynda 19-y men 22 shilde aralyǵynda mal soıý sehy men bazarlardyń jumys isteýine tyıym salynǵan. Sondaı-aq maldy soıýǵa, ony avtokólikter men jeke úı ıelerinen satýǵa tyıym salynady. Bir ereksheligi Almaty qalasynyń Ortalyq meshitinde belgilengen onlaın rejıminde qurbandyq shalynady.

Onlaın rejımde qurbandyq shalýdy júzege asyrý úshin qala aýmaǵyna janýarlardyń ákelinýine jol bermeý úshin Almaty aımaǵynyń kireberisterine beketter ornatylady.

Muqtaj adamdarǵa qurbandyqqa shalynǵan maldyń etin taratý úshin arnaıy adamdar jeke qorǵanysh quraldarymen qamtamasyz etiledi. Tez buzylatyn ónimderdi, sonyń ishinde qurbandyqqa shalynǵan maldyń etin tasymaldaý jáne saqtaý jónindegi sanıtarlyq-epıdemıologıalyq erejeler qatań saqtalady.

15 shildede koronavırýs ınfeksıasynyń 885 jaǵdaıy tirkeldi. Onyń 780-i sımptomsyz jáne 105-i sımptomdy. Infeksıalyq stasıonarlarda 2 292 adam, onyń ishinde 181 bala jatyr. Reanımasıa jáne qarqyndy terapıa bólimshelerinde 132 naýqas bar. Sondaı-aq 27 – ÓJJ, 39 - ınvazıvti emes ÓJJ, 61 High flow apparaty qosylǵan.

Búginde úıde BMSK jáne telemedısına ortalyǵynyń mobıldi brıgadalarynyń baqylaýynda 4 326 naýqas bar, sımptomdy jeńil jáne ortasha dárejesi bar - 3958, al sımptomsyz – 368 adam bar.

Almaty Ortalyq meshiti men qalalyq Sanıtarlyq-epıdemıologıalyq baqylaý departamentiniń ókilderi Qurban aıt merekesin ótkizýdiń belgilengen erejelerin qatań saqtaýǵa shaqyrdy. Qasıetti qurbandyq shalý rásimi koronavırýs ınfeksıasynyń odan ári órship, taralmaýyna tosqaýyl bolýy kerek.