Shymkent qalasynda turǵyn úı kezegi kelgen 74 azamatqa jaldamaly páter  kilti tabystaldy. Onyń ishinde 28 páter - kópbalaly otbasylarǵa, 39 páter - halyqtyń áleýmettik jaǵynan álsiz top múshelerine, 7 páter - jetim jáne ata-anasynyń qamqorlyǵynsyz qalǵan balalar sanatyndaǵy azamattarǵa berildi.

Atalǵan kópqabatty turǵyn úıler Turan, Turlan, Asar-2 shaǵyn aýdandarynan bólingen. Jaldamaly baspanamen qamtylǵandardyń qatarynda qala turǵyny Farıda Júnisova da bar. Ol 2014 jyly turǵyn úıge muqtaj azamattar kezegine kópbalaly otbasylar sanaty boıynsha kezekke tirkelgen.

Qala turǵyny osy ýaqytqa deıin turǵyn úı kezegin únemi egov elektrondyq portaly arqyly baqylap otyrǵan. Kópbalaly ana 7 jylǵa jýyq ýaqyt boıy turǵyn úı kezegin sabyr saqtap, shydamdylyq tanytyp kútken. Búginde jaldamaly baspanaǵa qol jetkizgen otbasynyń qýanyshynda shek joq.

Aıta ketý kerek, osy jyldyń sáýir aıynda turǵyn úıge muqtaj azamattar kezeginde turǵan 161 azamatqa satyp alý quqyǵynsyz jaldamaly páter qoldanysqa berilse, mamyr aıynda 147 arendalyq baspana turǵyndar ıgiligine tabystalǵan bolatyn. Sonymen birge jyl basynda 300 páter jumys isteıtin jastarǵa úlestirilgen edi. Al, jyl sońyna deıin 294 azamattyń pátermen qamtylýy josparlanýda.

Aıta keteıik, 2020 jyly turǵyn úı kezegindegi 1596 azamat arendalyq baspanaǵa qol jetkizgen bolsa, 904 páter jumys istep júrgen jastarǵa berilgen bolatyn.