Nur Otan partıasy tóraǵasynyń birinshi orynbasary Baýyrjan Baıbektiń zańgeri Aıjan Táshenova Janbolat Mamaı men Inga Imanbaıdy basqalardy qaralaý arqyly ózderiniń destrýktıvti qyzmetin jalǵastyrýda dep aıyptady. 

– Osy ýaqyt boıy Mamaı men Imanbaeva basqalardy qaralaý arqyly ózderiniń destrýktıvti qyzmetin jalǵastyrýda. Olardyń beınematerıaldary birjaqty aıyptaýshy sıpatqa ıe. Sondaı-aq olardy qylmystyq is úshin daıyn materıal dep sanaıdy, – dedi Táshenova.

Sondaı-aq Aıjan Táshenova "J.Mamaı men I.Imanbaıdyń apelásıalyq shaǵymy jalǵan derekterden, biliksizdik pen ekijúzdilikten turady" deıdi.

Al belsendi Janbolat Mamaı appelásıalyq sot otyrysynan soń facebook-te "mantıa kıgen bıliktiń notarıýsy Baıbektiń múddesin qorǵady" dep jazba jarıalap, "sot ózderiniń keltirgen derekteri men dálelderin kózge ilmedi" dep málimdedi. Sondaı-aq ol appelásıalyq sot sheshimimen kelispeıtinin, Joǵary sotqa, odan keıin BUU Adam quqyǵy komıtetine shaǵymdanatynyn jazdy.

B.Baıbek-J.Mamaı teketiresi belsendilerdiń kóktemde NurOtan partıasy tóraǵasynyń birinshi orynbasary týraly eki tilde fılm jarıalaýynan bastalǵan. Belsendiler fılmde UZUN Qulaq telegram kanalynda, ashyq derekkózderde, birqatar baspasóz betterinde jarıalanǵan aqparattar men derekterdi negizge alyp, B.Baıbekti Almaty ákimi bolyp turǵanda "búdjet aqshasyn "jep" mıllıarder atandy" dep aıyptaǵan. B.Baıbek buǵan jaýap retinde belsendilerdi sotqa berip, óziniń ar-namysyn zań aıasynda qorǵaıtynyn málimdegen. Almaty qalasy Áýezov aýdandyq №2 sotynda ótken azamattyq-prosessýaldyq proseste sýdıa Raıhan Sartaeva Baýyrjan Baıbektiń paıdasyna sheshim shyǵarǵan. Belsendiler vıdeorolıkterdi ınternetten óshirýge, sondaı-aq sot shyǵyndaryn óteýge mindettelgen. Sýdıa "belsendiler fılmdegi aıyptaýlarǵa birde-bir dálel usynbady, fılmdegi málimetter shyndyqqa janaspaıdy" dep málimdegen. Belsendiler keltirilgen dálelderdi sýdıa qabyldamaǵanyn aıtyp, "sottyń materıaldardy óshirý týraly sheshimi oryndalmaıtynyn" habarlaǵan. Artynsha apelásıalyq sotqa shaǵym túsirgen.