«Nur Otan» partıasy Tóraǵasynyń Birinshi orynbasary Baýyrjan Baıbek Facebook-tegi paraqshasynda Memleket basshysy Qasym-Jomart Toqaevtyń «Halyq birligi jáne júıeli reformalar – el órkendeýiniń berik negizi» atty Joldaýyndaǵy 3 negizgi máselege nazar aýdardy.

«Birinshiden, Memleket basshysynyń el Táýelsizdiginiń 30 jyldyǵy tusynda jasaǵan bul Joldaýy basymdyqtardy aıqyndap, memleket pen qoǵamnyń ári qaraı damý baǵytyn belgilep qana qoımaı, sonymen birge osy jyldar aralyǵynda júrip ótken jolymyzdy da qorytyndylaıdy. Qasym-Jomart Kemeluly Joldaýynyń basynda aıtqandaı, «Qazaqstan Tuńǵysh Prezıdentimiz – Elbasynyń dara saıasatynyń arqasynda tabysty el retinde búkil álemge tanymal boldy. Eń basty jetistigimiz – birtutas el bolyp, jańa memleket qurdyq. İrgemizdi bekitip, eńsemizdi tiktedik. Halyqaralyq qaýymdastyqtyń beldi múshesine aınaldyq. Turaqty qoǵam qalyptastyryp, ornyqty damý jolyna tústik», – dep jazdy «Nur Otan» partıasy Tóraǵasynyń Birinshi orynbasary.

Baýyrjan Baıbek atap kórsetkendeı, Qazaqstan – búginde irgesi berik, tuǵyry myǵym memleket. Muny ishki saıası turaqtylyǵy, beıbit syrtqy saıasaty jáne jalpy ornyqty ekonomıkasy qamtamasyz etip otyr. Kezinde opozısıanyń «qarajatty taratyp berý kerek» degenine qaramastan Elbasy Nursultan Nazarbaev qurǵan Ulttyq Qor búginde bizdiń ekonomıkalyq silkinisterdi eńserip qana qoımaı, eldiń ári qaraı damýy boıynsha jańa bastamalar usynýymyzǵa da múmkindik berýde.

«Ekinshiden, Joldaý búkil álemdi jaılap, elimizdi ábigerge salǵan koronadaǵdarys ýaqytynda, azamattardyń áleýmettik-ekonomıkalyq ahýaly nasharlaǵan jáne narazylyq kóńil-kúı artqan kúrdeli jaǵdaıda jasalyp otyr. Osyndaı kezeńde biz, ókinishke qaraı, geosaıası týrbýlenttiliktiń, álemdik derjavalardyń sanksıalyq teketiresteriniń kúsheıe túskenin baıqap otyrmyz. Aýǵanstannan myńdaǵan bosqyndar óz úılerin tastap ketip jatqanyn kórip otyrmyz, bul, árıne, Orta Azıa óńirindegi jáne jalpy bizdiń elimizdegi ahýalǵa da áser etpeı qoımaıdy», – dedi ol.

Onyń pikirinshe, mundaı kúrdeli jaǵdaıda Memleket basshysynyń Joldaýy basymdyqtardy aıqyn belgilep, qazirgi syn-qaterlerge naqty jaýap berip otyr.

«El Prezıdenti Qazaqstan úshin ulttyq birlikti odan ári nyǵaıtý, azamattyq qoǵamdy damytý men ekonomıkanyń sapaly ósýi úshin jańa yntalandyrý tetikterin qurýdyń basty basymdyqtary bolyp tabylatynyn atap kórsetti. Bul qazirgi qıyndyqtardy tabysty eńserýge múmkindik berip qana qoımaı, pandemıadan keıingi kezeńde el damýyn qamtamasyz etýge de jaǵdaı týdyrdy», – dedi partıa Tóraǵasynyń Birinshi orynbasary.

Úshinshiden, Baýyrjan Baıbek Memleket basshysynyń saıası jańǵyrtýǵa, azamattyq qoǵamdy damytýǵa, jańa áleýmettik standarttardy endirýge, otandyq bıznesti qoldaýǵa, sybaılas jemqorlyqqa qarsy is-qımylǵa, sondaı-aq memlekettik apparattyń tıimdiligin arttyrýǵa baǵyttalǵan baǵdarynyń júıeli ári tabandy iske asyrylyp jatqanyn atap kórsetti.

«Jyl saıynǵy joldaýlar men el Prezıdenti Qasym-Jomart Toqaevtyń «Nur Otan» partásynyń HH Sezinde jarıa etken «Ózgerister joly: Ár azamatqa laıyqty ómir!» Saılaýaldy baǵdarlamasynyń iske asyrylý barysy densaýlyq saqtaý júıesiniń sapasy, bilimniń qoljetimdiligi, sıfrlandyrý, óńirlerdi damytý sekildi mańyzdy máselelerdiń qashanda basty nazarda ekenin kórsetedi. Qarapaıym qazaqstandyqtarǵa ataýly, naqty qoldaý kórsetýge, olardyń ál-aýqatyn arttyrýǵa erekshe kóńil bólinýde», – dep atap ótti ol.

Onyń aıtýynsha, partıanyń qoǵamdyq qabyldaý bólmelerine azamattardan kelip túsken 100 myńnan astam ótinishke jasalǵan taldaý, sondaı-aq «Nur Otan» depýtattarynyń halyqpen kóptegen kezdesýleriniń qorytyndysy búginde eń ózekti 3 máselege baǵalardyń ósýi, komýnaldyq tarıfterdiń kóterilýi jáne baspanamen qamtamasyz etý jatatynyn kórsetip otyr. Osyǵan baılanysty Memleket basshysynyń pandemıa jaǵdaıynda halyq tabysyn arttyrýǵa jáne tutynýshylyq suranysty yntalandyrýǵa baǵyttalǵan 5 bastamasy der ýaqytta usynylyp otyr, dep sanaıdy Baýyrjan Baıbek.

Eń tómengi jalaqy mólsherin 60 myń teńgege deıin ulǵaıtý, bıznesti qyzmetkerleriniń jalaqylaryn kóterýge yntalandyrý sharalaryn iske asyrý, shaǵyn jáne orta bıznes úshin salyqtyq aýyrtpalyqty 34-ten 25%-ke deıin tómendete otyryp, eńbekaqy qorynan biryńǵaı tólem endirý, azamattyq qyzmetkerler sanatyndaǵylardyń basym bóliginiń jalaqylaryn jyl saıyn 20%-ke kóterý, sondaı-aq turǵyn úı nesıelerin alý sharttaryn ári qaraı ońtaılandyrý elimizdiń búkil derlik azamattaryn qamtıtyn sharalar bolmaq. Sarapshylardyń baǵalaýy boıynsha, eń tómengi jalaqy mólsheriniń ulǵaıýynyń ózi ǵana ekonomıkanyń 1,5%-ke ósýine ákeledi.

«Nur Otan» bıleýshi partıa retinde Joldaý men «Ózgerister joly: Ár azamatqa laıyqty ómir!» atty Saılaýaldy baǵdarlamanyń iske asyrylýyna júıeli qoǵamdyq baqylaýdy qamtamasyz etetin bolady. Jyl basynan beri respýblıkalyq deńgeıde saılaýaldy ýádelerdiń 11%-ti jáne óńirlik deńgeıde 12%-ti oryndaldy. Naqty sıfrlarmen kórsetsek, bul – 7,7 mln. sharshy metr turǵyn úı, 12,2 myń orynǵa arnalǵan 34 mektep pen 4,5 orynǵa arnalǵan 68 balabaqsha, 160 myńnan astam jumys orny bar 77 jańa kásiporyn. Jyl sońyna deıin taǵy da 200 ártúrli áleýmettik nysan, onyń ishinde jańa mektepter, aýrýhanalar jáne t.b. paıdalanýǵa beriledi», – dedi Baýyrjan Baıbek.

Postta aıtylǵandaı, kólik jáne ınjenerlik ınfraqurylymdy aýqymdy túrde damytý jeke blok boıynsha iske asyrylýda.

«Dostar! Memleket basshysy atap ótkendeı, «Biz tuǵyry myǵym el bolý jolynda kedergilerdi eńserip, qıyndyqtardy jeńip kelemiz. Munyń bárine berekeli birlik pen eseli eńbek arqyly jettik. Elimiz Táýelsizdik jylnamasynyń tórtinshi onjyldyǵyna qadam basqaly tur. Bul kezeńniń ońaı bolmaıtyny qazirdiń ózinde aıqyn baıqalýda. Sondyqtan, kez-kelgen syn-qaterge daıyn bolýǵa tıispiz. Tynymsyz izdenip, udaıy alǵa umtylýymyz qajet». «Nur Otan» adamdar ıgiligi jolynda jumys istep jatqan maqsaty aıqyn, naqty ister partıasy retinde el Basshylyǵy qoıǵan mindetter men qazaqstandyqtar aldyndaǵy óz saılaýaldy ýádeleriniń barlyǵynyń iske asyrylýyn qamtamasyz etedi. Biz birgemiz! Qıyndyqty eńserip, jeńiske birge jetemiz!», – dep túıindedi ol.