Nur Otan Tóraǵasynyń Birinshi orynbasary Baýyrjan Baıbek Saıası keńestiń keńeıtilgen otyrysy qarsańynda Elbasy, partıa Lıderi Nursultan Nazarbaevtyń tapsyrmasy boıynsha 216 óńirlik saılaýaldy baǵdarlamanyń iske asyrylý barysymen tanysý úshin aýdandardy da qamtı otyryp, aımaqtardy aralaýǵa shyqty. Búgin ol Aqmola oblysynda birqatar kezdesýler ótkizdi.

Onyń aıtýynsha, Memleket basshysy Qasym-Jomart Toqaev jarıa etken «Ózgerister joly: Ár azamatqa laıyqty ómir!» Saılaýaldy baǵdarlamasy aıasynda 2025 jylǵa deıin óńirde ómir sapasyn jaqsartý boıynsha mindetter iske asyrylady. Máselen, 3,5 mln. sharshy metr turǵyn úıdi engizý, 80 myń jumys ornyn asha otyryp, 245 jańa jáne qoldanystaǵy kásiporyndardy iske qosý jáne keńeıtý, aýyl halqyn, ıaǵnı jarty mıllıonǵa jýyq turǵyndy 100% sapaly aýyz sýmen qamtamasyz etý, 103 mektep salý jáne jóndeý, sondaı-aq taǵy basqa sharalardy iske asyrý josparlanǵan.

8 aıdyń qorytyndysy boıynsha 475 ındıkatordyń 27%-ti oryndaldy. Mysaly, 379 myń sharshy metr turǵyn úı, 209 km sýmen jabdyqtaý jelisi, 111 km gaz qubyry salynyp, jóndeldi. Jyl sońyna deıin Kókshetaýda 6 jańa mektep jáne № 1 mektep-gımnazıaǵa irgeles 600 oryndyq japsarjaı paıdalanýǵa engiziletin bolady. 14 myńdaı jańa jumys oryndary ashyldy.

«Aqmola oblysynyń ákimi, fılıal tóraǵasy Ermek Marjyqpaevpen birge «Nur Otan»-nyń saılaýaldy baǵdarlamasyna sáıkes Bulandy aýdanynda salynyp jatqan birqatar kásiporyndarda boldym. Máselen, Makınsk qus fabrıkasyn jańǵyrtý kásiporynnyń óndirisin arttyryp, ónimin eksporttaýdy ulǵaıtýǵa, sondaı-aq qosymsha 700-den astam jańa jumys ornyn qurýǵa múmkindik beredi. Sodan keıin Makınsk qalasynda «Bota-2015» JSHS-nyń qýattylyǵy táýligine 600 tonna shıkizatty óńdeıtin jańa maı zaýytynyń qurylysymen tanystym. Investısıa kólemi 5 mlrd. teńgeni qurap, 80 jańa jumys ornyn ashady», - dep jazdy Facebook-tegi paraqshasynda Baýyrjan Baıbek.

Jalpy, taıaýdaǵy 5 jylda «Nur Otan» agrarlyq sektorda 500 myń adamǵa deıin jumyspen qamtamasyz etý jóninde mindet qoıyp otyr. 2025 jylǵa qaraı aýyl sharýashylyǵynda jalpy ónim kólemin 1,3 ese, eńbek ónimdiligin – 2,5 ese, al eksportty óńdelgen ónimniń úlesin 70%-ke jetkize otyryp, 2 ese ulǵaıtýdy josparlaýda. Bul eldi ózi óndirgen negizgi azyq-túlik taýarlarymen qamtamasyz etedi.

Sol kúni Baýyrjan Baıbek Kókshetaýda Aqmola, Qostanaı jáne Soltústik Qazaqstan oblystarynda partıanyń saılaýaldy mindetteriniń oryndalýy boıynsha onlaın-formatta keńes ótkizdi.

Oń nátıjelerge qaramastan, jekelegen saılaýaldy ýádeler boıynsha jyl sońyna deıin oryndalmaı qalý qaýpi bar. Bul 60% jaǵdaıda jete qarjylandyrmaýǵa baılanysty. Máslıhattardaǵy fraksıalarymyzdyń jetekshi rólin eskere otyryp, ol 3 jyldyq kezeńge arnalǵan jergilikti búdjet jobalaryn qaraý kezinde atalǵan máselelerge erekshe nazar aýdarýdy tapsyrdy.

«Sondaı-aq, jekelegen aýdandar men qalalarda jobalyq qujattamanyń daıyn bolmaýyna, jer ýchaskeleriniń, ruqsattardyń jáne t.b. bolmaýyna baılanysty oryndalmaı qalý qaýpi bar. Osy máselelerdiń barlyǵy naqty sharalar qabyldana otyryp, partıa janyndaǵy keńesterdiń talqylaýyna shyǵarylatyn bolady. Elbasy, partıa Lıderi Nursultan Nazarbaev aıtqandaı, bizdiń negizgi mindetimiz – barlyq saılaýaldy ýádelerdi oryndaý. «Nur Otan» naqty ister partıasy retinde qazaqstandyqtardyń artqan senimin aqtaý úshin qolda bar búkil resýrsyn jumyldyrady!», - dep túıindedi partıa Tóraǵasynyń Birinshi orynbasary.