1 qyrkúıek kúni ádettegideı Shardara aýdanyndaǵy barlyq bilim oshaqtarynda alǵashqy qońyraý soǵylyp, oqýshylar súıikti mektepterimen qaıta qaýyshty. Aýdan ákimi Qamytbek Aıtóreev qaladaǵy «Shardara» mektep-lıseıindegi saltanatqa qatysyp, oqýshylardyń qýanyshyn bólisti.
-Elbasymyz eldigimizdi bekemdeıtin 5 ınstıtýsıonaldy reformany iske asyrýǵa arnaǵan 100 naqty qadamnyń 10-yn tikeleı bilim salasyna baǵyttap otyr. Munyń mańyzy óte zor dep bilemin. 2050 jyly aldyńǵy qatardaǵy 30 eldiń qataryna kirý úshin biz búgin bilimdi urpaq tárbıeleýimiz kerek. Balalarymyz alańsyz oqý úshin memleket tarapynan barlyq jaǵdaı jasalyp otyr. Bizdiń aýdandaǵy bilim sapasy jyldan jylǵa artyp kele jatyr dep aıta alamyn. Byltyrǵy oqý jylynyń qorytyndysynda shardaralyq túlekter UBT synaǵyn oblys boıynsha jaqsy deńgeıde tapsyrǵany sonyń bir dáleli. Osynaý bıikten bıylǵy oqý jylynda da kórinedi dep senemin. Jańa oqý jyly bastalýymen sizderdi quttyqtaımyn, - dedi Qamytbek Nurjanuly.
Munan soń aýdan basshysymen birge qalalyq qoǵamdastyqtyń tóraǵasy Qystaý İlesov «Shardara» mektep-lıseıiniń 1 synybyna qabyldanyp jatqan alty synyptyń oqýshylaryna Elbasy Nursultan Nazarbaevtyń «Meniń otanym – Qazaqstan» atty kitaptaryn syıǵa tartty.
Al, aýdandyq bilim bóliminiń basshysy Aqshagúl Berdalıeva «Jaýshyqum» mektep-lıseıindegi merekelik sharaǵa qatysty. Roza Júnisqulova basshylyq jasaıtyn bul bilim ordasynda ótken jyly test synaǵyn tapsyrýǵa qatysqan 36 túlektiń 30-y grantqa túsip, aýdan boıynsha 97,3 bal jıǵan edi. Aýdan mektepteriniń arasynan İ oryndy ıelengen bul bilim oshaǵynyń tabaldyryǵyn 51 bala jańadan attap otyr. Aýdandyq bilim bóliminiń basshysy Aqshagúl Berdalıeva men mektep dırektory Roza Júnisqulova jáne aýyl ákimi Serik Mahambet quttyqtaý sóz sóılep, 1 synyp oqýshylaryna Elbasy kitaptaryn tartý jasady. Alǵashqy qońyraý ústinde mektep-lıseı janyndaǵy ınternattyń meńgerýshisi, aýdannyń Qurmetti azamaty Muhan Qylyshbaıǵa oqaly shapan jabylyp, zeınet demalysyna shyǵaryp salysty.
Aıta keteıik, bıylǵy jańa oqý jylynda aýdan boıynsha 1 synypqa 2079 oqýshy qabyldandy.
Shardara aýdany ákimi apparatynyń baspasóz qyzmeti.
