Aqtaýda zamanaýı aıaldama iske qosyldy. Bul týraly Aqtaý qalasy ákiminiń baspasóz qyzmeti málim etti.

Buǵan deıin qala ákimdigi shaharda halyqtyń kúndelikti ómir sapasyn jaqsartý maqsatynda kásipkerlermen birlesip aıaldama salý jumystary bastalǵanyn habarlaǵan edi. 

Qazir qala boıynsha aıaldamalar salý jumystary qarqyndy júrgizilip jatyr.

«Ózderińizge málim qaladaǵy eski aıaldamalarda turǵyndarǵa qolaıly jaǵdaı jasalmaǵan. Iaǵnı, jaz mezgilinde ystyq, qys mezgilinde salqyn. Osyǵan oraı turǵyndardyń jaǵdaıyn jasaý úshin ári kásipkerlerdi qoldaý maqsatynda osy jobany iske qostyq», - dedi Aqtaý qalasynyń ákimi Nurdáýlet Qılybaı.

Jańa nysan Aqtaýdaǵy joǵary shaǵyn aýdanda ornalasqan. Onda as ishetin shaǵyn oryn men ájethana qarastyrylǵan. Aıaldamany ákimdiktiń biryńǵaı eskızine saı jeke kásipker Samat Túlenov óz qarajaty esebinen turǵyzdy.

Budan bólek joba aıasynda taǵy 2 aıaldamanyń tolyq qurylysy aıaqtaldy. Jyl sońyna deıin zamanaýı 7 aıaldama paıdalanýǵa beriledi.

Aıta keteıik, eski aıaldamalardy biryńǵaı eskızge saı qaıta jańǵyrtý jumystary qarastyrylyp jatyr.

Aqtaý qalasy ákiminiń baspasóz qyzmeti