Aýǵandyq sheneýnikter Qundyz qalasynyń talıbandyqtardan tartyp alynǵany týraly málimdedi. Bul týraly «Qamshy» portaly foxnews.com-ǵa silteme jasaı otyryp habarlaıdy.

Qundyz qalasynyń ákimi Gamdýllah Danıshı qaýipsizdik organdary qala bıligin búgin túnde aýyr kúrestiń nátıjesinde qaıtara alǵanyn aıtty. «Qosymsha járdem-kúshke ıe bolǵan mezette, biz Qundyz ishinde masshtabty operasıamyzdy bastap kettik. Nátıjesinde talıbandyqtar qashyp qutyldy», - dedi ol, jýrnalıserge bergen suhbatynda.

Aýǵanstannyń İİM ókili Sedık Sedıggı de qalanyń beısenbi kúni 3.30-da qaıtaryp alynǵany jóninde alǵashqylardyń biri bolyp Tvıtterde jazǵan bolatyn. Biraq, qalany tazartý operasıasynyń áli birneshe kúnge sozylýy múmkin dedi.

Ol «Associated Press-ke» bergen suhbatynda Qundyz qalasyn qaıtaryp alý birikken áskerdiń, polısıanyń jáne talıbandyqtarmen ornatylǵan blokpostardyń kózin qalaıda joıý degen maqsattyń ǵana arqasynda iske asqanymen bólisti. Sonymen qatar, turǵylyqty halyqqa arnalǵan negizgi qajettilikter men dári-dármekter jaqyn arada jetkiziletinin aıtty.

Sedıggı sársenbiden bastaý alǵan kúreste 200 talıbandyq qaza tapqanyn aıtsa, memlekettik qurban bolǵandar sany qanshany quraıtynyn jarıa etpedi.

Qundyzdyń polısıa bastyǵy Sarvar Hýsaını qaza tapqan talıbandyqtardyń múrdeleriniń kóbi qala kóshelerinen tabylǵanyn aıtty. Onyń sózine súıensek, búlikshilerdiń birazy álige deıin qara halyqtyń úıinde tyǵylyp otyrǵan kórinedi. Sebebi, qalanyń túrli aımaqtarynda atystar men urystardyń oryn alyp jatqany jóninde biraz qońyraýlar túsip jatyr eken.

Qundyz turǵyny Zabıolla qalanyń negizgi alańyna jaqyn turady. Onyń sózin arqaý etsek, qaladaǵy búlikshi áreketter áli jalǵasýda. Týra úıinen qońyraý soqqan ol: «Jaǵdaı múlde ýshyǵyp ketti, men jańa ǵana úıimniń janynan bombanyń jarylǵanyn estidim», - degen bolatyn.

Búlikshi áreket bastalǵan mezette Qundyzǵa qansha ásker kerektigin birden aıtý múmkin emes edi. Sebebi, talıbandyqtardyń dúısenbi kúni kenet uıymdastyrǵan shabýyly úkimetti de, áskerı qyzmetti de biraz tyǵyryqqa tiregen eken.

Sársenbi kúni tańerteń aýǵan áskerine kómek retinde AQSH-tyń áýe soqqylary bastaldy. Úsh amerıkandyq avıasoqqy qala mańyndaǵy talıbandyqtar ornyqqan aımaqqa baǵyttaldy. AQSH áskeriniń baspasóz hatshysy Braıan Trıbýs AQSH pen NATO-nyń koalısıa keńesshileri de Qundyz qalasyna kelip jetkenin jetkizgen bolatyn.

Nazgúl Nazar