QR Úkimeti aǵymdaǵy aıdyń 7-ne deıin aksızdik ónimderge qatysty qoldanylatyn naqty sheshimderdi qabyldaıdy. Parlament májilisiniń plenarly otyrysynda QR Ulttyq ekonomıka mınıstri Erbolat Dosaev myrza osylaı dep málimdegen.   Bul týraly «Qamshy» portaly zakon.kz-ke silteme jasaı otyryp habarlaıdy.

Qazaqstandaǵy salyqtan jaltarý, kedendik baqylaýdyń negizgi problemalaryn talqylanǵan májilistiń plenarly otyrysynda depýtat Vladıslav Kosarev shekaradan zańsyz ótkizilgen alkogóldik taýarlardyń máselesin kótergen. Kótergende jáı kótergen joq. Arzan araqtyń qazaqstandyq naryqty jaýlap alýyna baılanysty otandyq óndirýshilerdiń saýdasy báseńdep qalǵanyn aıtty.

— Meniń sizderge aıtaıyn degenim, bizdiń elimizdegi alkogóldik sýsyndar óndirisiniń kórsetkishi sońǵy jyldary kúrt tómendep ketken. Óıtkeni otandyq óndirýshiler, kórshiles Reseıden ákelinetin arzan ishimdikterge básekeles bola almaı jatyr. Bizde zańsyz ákelingen arzan araqtar naryqty jaýlap alǵan. Mysaly, jasyratyny joq, qazir kádigi aq araqtyń eń  arzany dúkenderde 450-aq teńge turady. Al otandyq aksızdik ónimderdiń baǵasy 2,5 myń teńge. Men sizge keıin sol jerlerdiń meken-jaıyn da kórsetip beremin. Al bul arzan ishimdikter qaıdan kelgen? Árıne, zańsyz kirgizilgen. Sonyń saldarynan, qazaqstandyq óndirýshiler de memleket búdjetine quıatyn salyq mólsherin 5-7 esege tómendetken. Óıtkeni óndiris turalap tur. Bul da jaqsy emes. Biz aksızderdi sol burynǵy kórsetkishinde ustap turýymyz kerek,-deıdi depýtat Ksoarev mınıstr Dosaevqa.

Ulttyq ekonomıka mınıstri depýtattyń saýalyna tosyǵan joq. Jaýap berdi. Bergende de qandaı. QR Úkimetiniń ózi qazir aksızder máselesin qarastyryp jatyr eken jáne jaqyn arady bul máseleni sheshedi-mys.

— Qazir biz aksızderge qatysty máseleni Úkimette qarastyryp jatyrmyz. Sondaı-aq, «Qazalko» asosıasıasymen birlese otyryp jumystar júrgizýdemiz. Olar jaqyn arada bizge barlyq esep-qısaptaryn ótkizedi. Al 2016 jylǵa qaraı otandyq alkogoldik sýsyn óndirisi qaıta qolǵa alayp, óndiristi joǵarylatý josparlanyp otyr. Men qaıtalap aıtamyn, dál osy zań jobasynyń ekinshi qaralymyna deıin, ıaǵnı 7-qazanǵa deıin Úkimet naqty qandaı sharalar qoldaný kerektigin aıqyndaıtyn bolady,-dedi mınıstri Ebolat Dosaev.

Osylaısha depýtat Kosarev Mınıstri Erbolat myrzaǵa arzan araqtyń qaıda satylatynyn aıtyp berýge ýáde etken.

Durys! Óte durys másel kótergen depýtat Kosarev arzan ishimdiktiń jolyn kesý arqyly otandyq óndirýshilerdiń órisin keńeıtýdi kózdese kerek. Bir jaǵynan qazynaǵa kelip túsetin salyq ta azaıyp qalǵan. Al dál osyndaı qarjylyq qıyndy qos búıirden qysqan kezeńde áptep-úptep paıda kórip qalýdyń barlyq amaly da kádege asatyny belgili. Tek bir ishimdi qyjyldatatyny – parlament pen úkimettiń basqa sharýalary qalmaǵandaı, arzan araqtyń «adresin» izdegendeı, «olpy-solpy qaljyńdy» parlament qabyrǵasynda aıtysqany qaı sasqany?!

Sana túısigi túsingenge – kezek kúttirmes zań jobasy – sheteldegi 5 mıllıon qandastyń tezirek atajurtyna oralýyna tosqaýyl bolyp turǵan – keıbir kedergilerdi alyp tastaý emes pe? Al bizdiń jarymjan sheneýnikter ishkilikten ózge másele tappaǵandaı, ony salyq tóleýden jaltarýdyń kóleńkesimen kólegeıleı otyryp talqyǵa salǵany keremet eken. Erli-zaıyptylar arasyndaǵy jynystyq qatynasqa salyq tóleý týraly beısaýat usynys, parlamenttegi arzan araq máselesi, endi ne qaldy? Ne bolsa da, parlamenttiń osy shaqyrylymy el esinde jaqsy saqtalatyny sózsiz.

Nurgeldi Ábdiǵanıuly

 «Qamshy» silteıdi