Aqtaý qalasyndaǵy Nazarbaev Zıatkerlik mektebiniń 40 oqýshysy «Týǵan elge taǵzym -2021» ólketaný-zertteýshilik ekspedısıasyna qatysyp, kıeli óńirdi zerttedi. Qarashanyń 1-i men 5-i aralyǵynda oqýshylar Mańǵystaý ólkesiniń florasy men faýnasy, tarıhı oryndary, kıeli mekenderi men óndiris oryndaryn aralap, óńir tynysyn óz kózderimen kórdi.

• Maǵan «Týǵan elge taǵzym» ekspedısıasy aıasynda óńirdiń óndiris oryndaryna barǵanymyz erekshe unady. Mańǵystaý óńirinde shet elge eksporttalatyn ónimderdi kórý biz sekildi jastarǵa serpin beredi jáne teorıalyq turǵydan ótken prosesteri, elementterdi óz kózderimizben kórdik, - deıdi ekspedısıa qatysýshysy Qanat Saqpaev.

Tanymdyq jobanyń alǵashqy kúninde balalar ólke týraly jalpy maǵlumat jınaýdan bastasa, ekinshi kúni ólkeniń florasy men faýnasyn zertteýge attandy. Bul kúni zıatkerler Qarakól kóline, Kaspıı ıtbalyqtaryn ońaltý ortalyǵyna, straýs fermasyna jáne, botanıkalyq baqqa bardy. Al úshini kúni óńirdegi bıtým shyǵarý zaýyty men amıak zaýytyn kórdi. Al tórtinshi kúni sapar Súltan úpi, Shaqpaq ata jerasty meshitteri men «Otpan taý» tarıhı mádenı keshenine saıahatpen jalǵasyn tapty.

«Týǵan elge taǵzym» tarıhı-ólketaný zertteýshiler ekspedısıasy «Nazarbaev Zıatkerlik mektepteri» DBUU bastamasymen jyl saıyn ótkizilip keledi. Ekspedısıanyń basty maqsaty – zıatkerlerdiń týǵan elge súıispenshiligin arttyryp, patrıottyq tárbıe berip qana qoımaı, Qazaqstannyń óndiristik áleýetin tanytý jáne balalardy zertteý jumystaryn júrgizýge baǵyttaý.