El Táýelsizdiginiń 30 jyldyǵy aıasynda VI respýblıkalyq «Worldskills Kazakhstan» chempıonaty bastaldy. Mańǵystaý oblystyq bilim basqarmasy baspasóz qyzmetiniń habarlaýynsha, Aqtaýda «Worldskills Kazakhstan» chempıonatynyń «Naýbaıshy isi» quzyrettiligi boıynsha konkýrstyń ashylý saltanaty ótti. Sharada Mańǵystaý oblysy ákiminiń orynbasary Gúlmıra Qalmuratova qatysýshylarǵa sáttilik tilep, óz lebizin jetkizdi.

-«WorldSkills» chempıonaty tehnıkalyq jáne kásiptik bilim salasyndaǵy basty kórsetkishteriniń biri bolyp otyr. Respýblıkamyzdyń 180 koleji «Jas maman» jobasy boıynsha jabdyqtalyp, ulttyq chempıonatty óńirlerde ótkizý múmkindigi týdy. Mańǵystaý týrızm kolejiniń bazasynda bul konkýrstyń ótýi oblys úshin de úlken mártebe. Sizder árbir sala mamandyqtaryn halyqaralyq deńgeıge saı dárejede meńgerip, sheteldik kadrlarǵa básekelestik týdyratyn maman bolýyńyz qajet. Sebebi qazir elimizde ındýstrıaldy-ınnovasıalyq damý baǵdarlamasyna sáıkes ár óńirde jańa óndiristik kásiporyndar salynýda. Olarǵa bilikti kásibı jumysshy mamandary aýadaı qajet»,-dedi Gúlmıra Qalmuratova.

Aldaǵy úsh kúnde Aqtaýdaǵy týrızm kolejinde ár aımaqtan kelgen 15 stýdent pen sarapshylar óz baqtaryn synaıdy. Aıta keteıik búgin konkýrstyń qatysýshylary úshin jumys oryndaryn daıyndaý kezeńi ótedi. Sodan soń «Aktau Tourism City Ltd»  RIXOS  qonaqúıindegi TETYSBLU  parkine saıahat júrgiziledi. 9, 10, 11 qarasha kúni konkýrstyń negizgi bólimi ótkizilip, 11 qarashada CIS baǵalaý júıesinde qorytyndy shyǵarylady.