14-shi TAPSYRMA
QR Úkimeti:
2013 jyldyń 1 shildesine deıin, eger medısına qyzmetkeri tarapynan salaqtyqpen nemese júrdim-bardym qaraý bolmasa, azamattyń densaýlyǵyna nuqsan keltirgeni úshin dárigerlerdiń kásibı jaýapkershiligin mindetti túrde qamsyzdandyrýdy engizý jónindegi máseleni taldap-zerttesin;
2012 jyldyń aıaǵyna deıin, emdik quraldardy paıdalanýǵa qatysty turǵyndardyń habardarlyǵy deńgeıin arttyrýdyń pármendi tetikterin engizsin. Árbir qazaqstandyq salamatty ómir saltynsyz, tamaqty tarta ishpeıinshe, qımyl-qozǵalyssyz jáne sportsyz uzaq ómir súrý múmkin emes ekenin bilýge tıis.
Bul - ómirdiń ashshy shyndyǵy. Eger biz Qazaqstandaǵy ortasha ómir jasy Eýropadaǵydaı bolǵanyn qalasaq, onda ózimizdiń densaýlyǵymyz týraly oılanýǵa tıispiz.
Árbir eldi mekende, sonyń ishinde aýyldyq jerlerde, sondaı-aq árbir mekeme men kásiporynda belsendi demalysty, dene tárbıesi men buqaralyq sportty damytý úshin birte-birte jaǵdaı jasaý jón. Eldiń oqý oryndarynda dene tárbıesiniń oqýdan tys sabaqtary men seksıalaryn keńeıtý kerek.
15-shi TAPSYRMA
- QR Úkimeti 2012 jyldyń sońyna deıin oqýshylar úshin oqýdan tys sport seksıalaryn búdjettik emes qarjy kózderinen qarjylandyrýdyń tetikterin engizýdi qamtamasyz etsin;
- Qazaqstan Úkimeti Sport jáne dene tárbıesi isteri jónindegi agenttikpen birlese otyryp, memlekettik áleýmettik tapsyrys júıesi arqyly úkimettik emes uıymdarmen, qoǵamdyq birlestiktermen áriptestiktiń jańa túrlerin taldap-jasasyn.
Qazaqstandyq jankúıerler elimizdiń Kontınenttik hokeı lıgasyna qatysýyn yqylaspen qabyl aldy.
Astanalyq «Barys» komandasynyń árbir oıyny jurtshylyqtyń zor qyzyǵýshylyǵyn týǵyzýda. Balalar hokeıge búkil synybymen keletin boldy.
Bul praktıkany sporttyń basqa túrlerine de oraılastyryp keńeıtý kerek.
Qazaqstandyq komandalardyń shet elder chempıonattarynyń joǵary lıgalaryna qatysý múmkindigin zertteý qajet. Máselen, fýtbolda.
Biraq, eń bastysy, taǵy da qaıtalaımyn - adamnyń óziniń óz densaýlyǵy men turmys saltyna degen jeke kózqarasy.
Bul jerde eshkimdi májbúrleý múmkin emes. Bul sanaly oılastyrylǵan jeke tańdaý bolýy tıis.
Búginde sol sıaqty Ulttyq lotereıany damytý júıesiniń jańa tıimdi modelin usyný qajet.
