Búgin barsha qazaqstandyqtar Qazaq handyǵynyń 550 jyldyǵyn toılaıdy. Astanadan bastaý alatyn saltanatty shara 11-13 qyrkúıek kúnderi aralyǵynda jalǵaspaq. Bul týraly "Qamshy" portaly "Kazınform" - ge silteme jasaı otyryp habarlaıdy.

Mereıtoıdyń saltanatty ashylýy saǵat 11.00-de Astanadaǵy Táýelsizdik saraıynda Elbasy Nursultan Nazarbaevtyń qatysýymen oryn alady. Aıtýly jıynǵa qoǵam qaıratkerleri, úkimet músheleri men Parlament depýtattary, tarıhshylar jáne BAQ ókilderi qatysady dep kútilýde.
Sonymen qatar, «Qazaq Eli» alańynda 50 kıiz úı tigilip, eki úlken sahna, sport alańdary, altybaqandar, taıqazan jáne t.b. ornatyldy. Merekelik sharany shamamen 10 myńnan astam adam qatysady dep josparlanǵan dep habarlaıdy Qazaqparat.
Uıymdastyrýshylar qala turǵyndary men qonaqtarynyń nazaryna qyzyqty oıyn-saýyq jáne konserttik baǵdarlama usynady. Elimizdiń ár óńiri úzdik horeografıalyq ujymdardyń, ansámblderdiń, halyq jáne estrada óneriniń solıseriniń qatysýymen ótetin konserttik baǵdarlamadan basqa, kórermender nazaryna «Qazaqstannyń ejelgi qalalary» beıneprezentasıasyn, «Qazaq ulttyq kıiminiń tarıhy arqyly halyq tarıhyn jetkizý» atty sán festıvalin, «Sıqyrly bı álemi» bı festıvalin, «Birligimiz jarasqan» atty Qazaqstan halqy dostyǵy konsertin, «Ǵasyrlar úni» etno-konserti usynylady. Budan basqa, etnoaýylda jetim balalarǵa arnalǵan ekskýrsıa jáne astanalyq daryndy jastardyń qatysýymen konsert ótkiziledi.
Atalmysh sharada qazaq kúresi, arqan tartý, toǵyz qumalaq, buqa tartys, arqan tartys, asyq atý syndy ulttyq sport túrlerinen jarystar uıymdastyrylady. Merekelik sharalar baǵdarlamasyna sándik-qoldanbaly óner kórme-jármeńkeleri, halyq sheberleriniń sheberlik dáristeri engizildi.
Barlyq oblystardyń ulttyq kıim kıgen ókilderiniń sherýi úsh kúnge jalǵasatyn merekeniń kórkin keltirmek. Shara 12 qyrkúıekte saǵat 10.00-de «Qazaq Eli» monýmentiniń aldyndaǵy alańda ótpekshi. Osy kúni saǵat 19.00-de óńirlerdiń eń úzdik nomerleri gala-konsertte kórermender nazaryna usynylady.
"Qamshy"  silteıdi