«Nur Otan» partıasy Tóraǵasynyń birinshi orynbasary Baýyrjan Baıbek elordada «Nur Otan» partıasynyń saılaýaldy ýádeleriniń oryndalý barysymen tanysty.

Onyń aıtýynsha, Elbasy, partıa Lıderi Nursultan Nazarbaevtyń tapsyrmasy boıynsha partıa ár oblysta, qalada jáne aýdanda 217 jol kartasynyń iske asyrylýyna júıeli baqylaý júrgizýde.

Memleket basshysy Qasym-Jomart Toqaev jarıa etken «Ózgerister joly: Ár azamatqa laıyqty ómir!» atty Saılaýaldy baǵdarlama aıasynda jyl basynan beri Nur-Sultan qalasynda 20 myńnan astam turaqty jumys orny ashylyp, 7 dárigerlik ambýlatorıa paıdalanýǵa berildi, 96 kóshe jóndeýden ótti jáne t.b. Bul jumystardyń basym bóligi qala shetinde júrgizildi.

«Fılıal tóraǵasy, qala ákimi Altaı Kólginovpen birge «Óndiris» turǵyn alabyndaǵy №23 mekteptiń 600 oryndyq jańa korpýsyn araladym. 2019 jyly el Prezıdenti Qasym-Jomart Toqaev bul aýdanda halyq tyǵyz ornalasqanyndyqtan, atalǵan oqý ornyn keńeıtýdi tapsyrǵan edi. Jańa korpýstyń qurylysy partıanyń qalalyq saılaýaldy baǵdarlamasyna engizildi. Jalpy, partıa elordada 2025 jylǵa deıin 60 myń orynǵa arnalǵan keminde 50 jańa mektep salý mindetin qoıyp otyr. Bıyldyń ózinde 8 jańa mektep ashyldy, taǵy 7 nysannyń qurylysy aıaqtalýda», - dep jazdy ol Facebook paraqshasynda.

Sondaı-aq, Baýyrjan Baıbek «Óndiris» turǵyn alabynda dene shynyqtyrý-saýyqtyrý keshenine bardy. Jyl sońyna qaraı munda kúndelikti 500-den astam adam sambo, kıkboksıń, paýerlıftıng jáne basqa da sport túrlerimen aınalysa alady. Jalpy, partıanyń ýádelerine sáıkes osy jyldyń ózinde óńirlerde 127 myńnan astam seksıa ashylyp, 22 myńnan astam balalar úıirmesiniń jumysy qaıta jandandy.

Sodan keıin partıa Tóraǵaǵasynyń birinshi orynbasary astanadaǵy JEO-2-ni gazǵa kóshirý jumystarynyń barysymen tanysty.

«Elbasy «Nur Otan» Saıası keńesiniń otyrysynda aıtqandaı, ekologıa máseleleri elimiz ben bıleýshi partıa úshin negizgi basymdyqtardyń birine aınalýy tıis. Búginde nysan 95%-ke aıaqtaldy. Gazdandyrý nátıjesinde azot jáne kómirtegi totyqtarynyń, parnıktik gazdardyń shyǵaryndylary aıtarlyqtaı azaıyp, kómir kúliniń shyǵaryndylary tolyǵymen joıylady. Elbasynyń óńirlerdi gazdandyrý jónindegi «Saryarqa» jobasy aıasynda jyl basynan beri qalada 10 myńnan astam úıge gazben jabdyqtaý jelilerine qoljetimdilik qamtamasyz etildi», - dedi ol.

Osy kúni Baýyrjan Baıbek qalalyq partıa aktıvimen birge elorda boıynsha saılaýaldy baǵdarlamanyń iske asyrylý barysyn talqylady.