Almatyda  «ÖzgeEpic»   zamanaýı óner keńistigi Jauhar» dástúrli mýzyka  jobasynyń tusaýkeseri ótti. “Jauhar” – ulttyq mýzykany zamanaýı formatta usynatyn jańa joba.

«ÖzgeEpic» - táýelsiz qazaq ónerin damytatyn keńistik.

Zamanaýı teatr, mýzyka, kórkemóner, ádebıet, kıno janrlary boı̆ynsha jobalardy júzege asyratyn óner platformasy. Ulttyq ónerdi oıýǵa ǵana orap kórsetý, álemdik tendensıalarmen kiriktirmeý - ony jas býynnan alystatyp, zaman kóshinen qaldyryp barady.

Joba uıymdastyrýshylary  Maqpal Jumabaı men Toǵjan Qurmanjanovanyń aıtýynsha, negizgi maqsat – zamanaýı tehnologıa kómegimen naǵyz qazaq áýenin jandandyrý, sol arqyly dástúrli án-kúı mektepterin jastar arasynda keń taratý. Sol úshin joǵary deńgeıli dybys jazý, óńdeý prosesimen zamanaýı vıdeotúsirilim qatar usynylǵan.

Joba aıasynda elimizdiń ulttyq mýzyka mektepterin tolyǵymen qamtý josparlanǵan. «Jauhardyń» alǵashqy kezeńinde Mańǵystaý jyrshylyq mektebiniń ókilderin nasıhattaý kózdelip, kórermenge on jyrshynyń óneri kórsetilgen. Alǵashqy maýsym 10 epızodtan turady. Ár epızod bir jyrshynyń shyǵarmashylyǵyn qamtıdy, hronometrajy 35-40 mınýt.

Mańǵystaý  jyrshylyq mektebiniń ókilderin  nasıhattaý nátıjesinde, jobaǵa Amandyq Kómekuly, Uzaqbaı Sahıev, Jetkizgen Seıitov, Ahmet Baıekeshov, Arǵyn Bısenuly, Amanbek Sáýirbaev, Ońdasyn Qalqan, Ospan Qulsymaqov, Rızabek Serik, Baqdáýlet Tolybekuly sekildi 10 jyrshy qatysyp, Mańǵystaý ólkesiniń  eleýli oqıǵalaryn baıandaıtyn ańyz-jyrlardy ortaǵa saldy. Abyl Tileýuly,  Nurym Shyrshyǵululy,  Aqtan  Kereıuly, Qashaǵan Kúrjimanuly t.b shyǵarmalary oryndaldy.

«Jauhar» dástúrli mýzyka jobasy  Youtube  platformasyndaǵy «Jauhar live» kanalynda keńinen damytylyp, joǵary sapaly dybys pen vıdeokontent usynylady. Sonymen qatar, jyl aıaǵyna deıin barlyq mýzykalyq strımıngtik platformalarda  10 mýzykalyq álbom jarıalanyp, tyńdaý múmkindigi qosa beriledi.

“Jaýhar” sózi asyl, baǵa jetpes qundylyq degen maǵynany bildiredi ǵoı.
Qazaq halqy qaıtalana bermeıtin daralyqty jaýharǵa teńegen, álemdegi eń kórkem sulýlyqty jaýharǵa balaǵan, dúnıedegi jan tebirenter sezimdi jaýhar dep sıpattaǵan.
Osy sebepten de qazaq janynyń bar syryn, qazaq halqynyń bar bolmysyn ashatyn ulttyq mýzykamyzdy biz jaýharǵa teńestirdik. Dástúrli mýzykanyń jas býyn arasynda nasıhaty kemshin ekeni jasyryn emes.  Sol úshin kórermenge usyný kerek, kórsetý kerek. Jeńil-jelpi dúnıe jasap jatqanymyz joq. Sol úshin  dástúrli mýzykany zamanaýı formatta usynyp, onyń sıfrly qoryn jasaqtamaq nıettemiz”, - deıdi Maqpal Jumabaı.

Tusaýkeserge kelgen qonaqtar da, óner ıeleri de  mundaı jobalar kerek ekenin, nasıhaty kemshin túspese eken degen nıetterin jetkizdi.