El táýelsizdiginiń 30 jyldyǵy men Tuńǵysh prezıdent kúni qarsańynda Mańǵystaý aýdany, Jarmysh aýylynda zaman talabyna saı mádenıet úıi paıdalanýǵa berildi. Bul jarmyshtyqtar úshin kópten kútken qýanysh.
«Jumyspen qamtýdyń jol kartasy» baǵdarlamasy aıasynda salynǵan nysan eki qabatty. Birinshi qabatynda 200 oryndy kórermen zaly, bı zaly, 10 myń kitap qory bar kitaphana, foıe, grım, kıim iletin oryn jáne basqa da sharýashylyq bólmeleri ornalasqan.  Al, ekinshi qabatynda shyǵarmashylyqpen aınalysatyn ádistemelik ortalyq, dybys, jaryq, rejıssýra, mádenı uıymdastyrýshy bólmesi, túrli úıirmelerge arnalǵan bólmeler bar. Mádenıet úıi materıaldyq-tehnıkalyq bazamen tolyq jabdyqtalǵan.
Jarmyshtyqtardy jadyratqan sharaǵa oblystyq mádenıet basqarmasynyń basshysy Pánıa Sarmýrzına, aýdan ákimi Tilek Kóshmaǵanbetov qatysyp, aýyl turǵyndarynyń qýanyshymen bólisti. Eki qabatty eńseli mádenı ortalyqtyń lentasyn qıý qurmeti mádenıet salasynyń ardageri Shamshadın Sabytaevqa buıyrdy. 
Aıta keteıik, Jarmysh mádenıet úıinde 93 múshesi bar 6 klýbtyq qurylym jumys isteıdi. Onyń ishinde 1969 jyly qurylyp, 1979 jyly «Halyqtyq» ataǵyn alǵan Jarmysh halyq teatry da bar. Sondaı-aq, án-bı ansambli, kóńildi tapqyrlar alańy, dombyra úıirmesi jáne mánerlep oqý úıirmesi úzdiksiz jumys jasap tur. Úıirmelerge aýyldyń seksenge jýyq balasy qatysady. Al, kitaphananyń kitap qory – 10112, jylyna 600-deı oqyrman qabyldaıdy. Kitaphana ishinde qor jınaıtyn eki bólme, balalar ádebıeti bólimine arnalǵan bólme, oqý zaly bar.