El Táýelsizdiginiń 30 jyldyǵy jáne Mańǵystaý munaıynyń 60 jyldyǵy aıasynda Jańaózen qalasynyń turǵyndary úshin zamanaýı kópfýnksıonaldy sport kesheni ashyldy.

Sport kesheninde qazaq kúresi, erkin kúres, grek-rım kúresi, dzúdo, kıokýshınkaı karate-do, taekvondo, mýaı-taı, kýdo, grepplıng jáne taǵy da basqa sport túrlerimen aınalysýǵa barlyq jaǵdaı jasalǵan. Sondaı-aq, keshende mını-fýtbol, voleıbol, basketbol jáne tenıs alańdary, boks rıngi jáne eki jolaqty júgirý joldary ornalasqan.

Keshen qajetti qural-jabdyqtarmen jabdyqtalǵan. Qala turǵyndaryna yńǵaıly bolý úshin sheshinetin bólmeler men jankúıerlerdiń jyljymaly trıbýnalary ornatylǵan. Bul sport kesheni aýa raıyna qaramastan jyl boıy jumys isteıtin bolady. Ortalyq ankerlik júıeniń kómegimen negizge bekitilgen eki qabatty aýa ótkizbeıtin membranamen jabylǵan. Atalǵan dızaın qysta jylýdy jáne jazda salqyndyqty saqtaýǵa múmkindik beredi.

- Búgin el Táýelsizdiginiń 30 jyldyǵy jáne Mańǵystaý munaıynyń 60 jyldyǵy aıasynda Jańaózen qalasynda halyqtyń ıgiligine taǵy bir zamanaýı sport nysany paıdalanýǵa berilmek. Bul nysan sport súıer qaýym úshin ǵana emes, tutas jańaózendikter úshin mańyzdy oqıǵaǵa aınaldy, sebebi salaýatty ómir saltyn ustanyp, sportpen aınalysam deýshilerdiń sany óte kóp. Bul birinshi kezekte sportqa qalamyzda qyzyǵýshylyqtyń artyp kele jatqandyǵynyń kepili dep aıtýǵa bolady jáne bul keshende talaı jerlesterimiz, álemge belgili sportshylarymyz Ádilbek Nıazymbetov, Bekzat Nurdáýletov tárizdi chempıondar tárbıelenip shyǵatynyna senimdimin! - dedi Jańaózen qalasynyń ákimi Maqsat Ibaǵarov.

Sport kesheni «Samruk-Kazyna Trust» áleýmettik jobalardy damytý qorymen ashyldy.

-Bul Qazaqstanda Qor bastamasymen ashylǵan ekinshi aýqymdy sport kesheni. 2022 jylǵa deıin osyndaı sport keshenderi taǵy 10 aımaqta paıda bolady. Bul bastama kem degende 35 myń adamdy qamtıdy dep josparlanýda. Bul keshendi asha otyryp jáne basqa da áleýmettik jobalardy iske asyra otyryp, «Samruk-Kazyna Trust» Qory «Samuryq-Qazyna» kompanıalar tobynyń atynan júzege asatynyn atap ótý mańyzdy. Kompanıalar tobynyń quramyna Mańǵystaý oblysynda ornalasqan uıymdar da kiredi: «Ózenmunaıgaz», «Qarajanbasmunaı», «Qazaqteńizkólikfloty», «CASPI BITUM» jáne taǵy basqalary – dedi «Samruk-Kazyna Trust» Bas dırektorynyń orynbasary Sergoja Qalıasqarov.