Qytaıdyń Saýda mınıstrligi AQSH Shyńjań aımaǵynan taýarlardy ımporttaýǵa tyıym salýyna "qatty narazylyq pen úzildi-kesildi qarsylyq" bildirdi.
"Mınıstrlik AQSH-tyń áreketin ekonomıkalyq qorlaý dep sıpattady" dep habarlady qytaılyq Sınhýa memlekettik aqparat agenttigi.
AQSH prezıdenti Djo Baıden beısenbi kúni Qytaıdyń Shyńjań aımaǵynda óndirilgen taýarlardyń ımportyna tyıym salatyn zańǵa qol qoıǵan bolatyn. Amerıka Qurama Shtattary Kongresiniń músheleri usynǵan zań osy aıdyń basynda Ókilder palatasynda da, Senatta da biraýyzdan maquldanǵan jáne zań jobasy Aq úıge jiberilgen. AQSH prezıdenti Djo Baıden oǵan qol qoıatynyn aıtqan.
Halyqaralyq quqyq qorǵaý uıymdary men keıbir demokratıalyq elder Shyńjańdaǵy uıǵyr, qazaq, qyrǵyz sıaqty azshylyqtar májbúrli eńbekke jegilip jatyr dep alańdaıdy.
Qytaı Shyńjańdaǵy azshylyqtarǵa jasalǵan qıanat týraly aıyptaýlardy ótirik dep sanaıdy.
Baıden ákimshiligi sondaı-aq ótken aptada Beıjińdi "Shyńjańdaǵy az ulttarǵa joǵary tehnologıalyq baqylaýdy kúsheıtip otyr" dep aıyptap, birneshe qytaılyq tehnologıalyq kompanıalarǵa jáne mekemelerge saýda sanksıalaryn salǵan.
Taıaýda Beıjińniń Shyńjańdaǵy qazaq, uıǵyr sıaqty azshylyqtarǵa júrgizgen saıasatyna qarsy Vashıngton sanksıalar jarıalaǵan. Kóp ótpeı AQSH-tyń dinı bostandyqty baqylaıtyn úkimettik komısıasynyń tórt múshesine Beıjiń sanksıa jarıalady.
Sonymen qatar, AQSH, Avstralıa, Ulybrıtanıa jáne Kanada Beıjiń qysqy Olımpıada oıyndaryna dıplomatıalyq boıkot jarıalap, óz mınıstrlerin jibermeıtinin málimdegen.
AQSH prezıdenti Djo Baıden aldyńǵy aıda Beıjiń olımpıadalyq sport oıyndaryna boıkot jarıalaý jospary bar ekenin málimdegen. Keıinirek AQSH Beıjiń Olımıpıadasyna boıkot jarıalaǵan alǵashqy el atandy.
Vashıngtonnyń bul áreketinen kóp ótpeı Beıjiń AQSH-ty aıyptady.
Keıinirek BBC "Beıjiń-2022 boıkotynyń qanshalyqty mańyzy bar" ekeni týraly saraptama maqala jarıalady.
Halyqaralyq uıymdar jáne kóptegen demokratıalyq elder Qytaıdy "Shyńjań avtonomıasynda turatyn uıǵyr, qazaq sıaqty musylman azshylyqtaryna genosıd jasady" dep aıyptaıdy.
Sonymen qatar, Beıjińniń Gonkongtaǵy saıası bostandyqtardy basyp-janshý áreketine qatysty da shıelenis kúsheıe tústi.
Pikir qaldyrý