Tehasta qazaq emıgranttary salǵan qazaq mektebinde bolyp qaıtqan jýrnalıs Adılá Túgel mektep qabyrǵasynda alǵan áserlerimen bólisti.

Bul týraly esquire.kz-ke silteme jasap "Qamshy.kz" habarlaıdy.
Tamyzdyń sońǵy jeksenbisinde Tehastaǵy qazaq mektebiniń ashylýynda bolyp qaıtqan jýrnalıs ondaǵy qarapaıym qazaqtardy kórip tań qalǵan. Mektepke jetkende kıiz úıdi emes, kádimgi amerıkalyq stıldegi eki qabatty jekejaıdy kórdik. Esigin ashyp, kóptegen úlken-kishi aıaq-kıimderdi kórgende, úıime topyrlap qonaqtar kelgendegi cát esime túsip ketti. Ustaı almaısyń, ustaı almaısyń dep júgirip júrgen qazaq balalarynyń daýysy qulaǵyma jetkende, tap bir qazaq jerinde júrgendeı sezimde boldym ,  deıdi jýrnalıs.
Jýrnalısiń aldynan Merýert esimdi áıel shyǵyp, mektepti Mońǵolıadan kelgen birneshe qazaq otbasylary ashqandaryn aıtyp bergen.
Mekteptiń jumys istep jatqanyna úsh jyl bolǵan eken. Onda oqıtyndardyń deni ata-analarymen Tehasqa ýaqytsha kóship kelgen oqýshylar. Ár jeksenbi saıyn balalar qazaq tilin, ádebıetin oqyp, dombyra men ulttyq bılerdi úırengenshe ata-analary shaı iship, kútip otyrady. Mektep aqsha tabýdy kózdeıdi dep aıta almaısyń. Aqysy bar-joǵy semestrine 100 dollar. Onyń ishine kitaptar, jekejaıdy jaldaý, oqytý da kiredi. Munda qyzmet etetinderdiń deni óz dástúrin ózge elde saqtaýǵa úlesin qosýǵa ázir eriktiler,  deıdi avtor.
Mektep basshylyǵynyń aıtýynsha, olar Qazaqstan elshiliginen kitaptar syıǵa tartý sıaqty azyn-aýlaq kómek suraǵan. Alaıda jaýap sol beti qaıtpaǵan. Mundaǵy qazaqtar úshin otan geografıalyq emes, rýhanı deńgeıdegi uǵym. Olar ata-babadan qalǵan dástúrlerdi saqtap, ana tilinde sóılegendi qurmet tutady,  deıdi Adılá.
Maqala avtory bolashaqta bul jeksenbilik mektepke amerıkalyqtar da aǵylyp, jumysy jandana túsetinine tilekshi ekenin jazǵan.

 "Qamshy" silteıdi